"Artibai familia handi bat da, eta sasoirik onenean dago"
Artibai Futbol Taldeak 40. urteurrena ospatu du aurten, eta klubak izango du pregoia irakurri eta txupina botatzeko ardura. "Pozik" daude, eta "hunkigarria" izango dela diote.
Argazkia: Artibai Futbol Taldea Uztailaren 15ean Karmen jaiei hasiera emateko ardura eta ohorea Artibai Futbol Taldearena da aurten. 18:15ean Goikoportalean pregoia irakurri eta txupina botatzeagaz batera hasiko dituzte herriko jai nagusiak.
Klubak 40 urte bete ditu aurten, eta erantzukizuna ez dute ezustean hartu: “Sorpresa handia ez da izan; aukerak bazeuden, eta Artibai izan da aukeratua, eta alde horretatik pozik gaude”. Pregoilariak zeintzuk izango diren oraindik seguru ez badakite ere, “klubeko figura esanguratsuak” izatea pentsatu dute, adibidez, neskaren bat eta beteranoetariko bat: “Mezuan gure baloreak goraipatuko ditugu: alkarlana, errespetua… Horiek zabaldu gura ditugu, eta era berean, talde moduan goraipatuko dugu boluntario pila batek egiten duen lanagatik irteten dela kluba aurrera. Bide horretatik joango da pregoia”.
Aurtengo Artibai Eguna herrigunean, herriagaz eta herritarrekin ospatu zuten, eta 40. urteurrena herriagaz ospatzen segitzeko beste aukera bat izango da pregoia irakurri eta txupina botatzeko unea. “Hori prestatzen egon ginenean ez geneukan buruan pregoilari izan gintezkeenik. Hilabete asko egon ginen 40. urteurreneko egun hori prestatzen; herrira zabaldu eta herrian egitea erabaki genuen eta, agian, hori ere kontuan hartu dute”.
“Mezuan gure baloreak goraipatuko ditugu: alkarlana, errespetua…”
1983an hogei pertsonak sortu zuten Artibai Futbol Taldea. Herrian futbol zelairik ere ez zeukaten, eta lau urtez Berrizen jokatzen egon ziren. Ordutik, ibilbide oparoa bete du klubak. Gaur egun, 350 bat kide dira, ume, gazte, entrenatzaile eta abarren artean. “Itzelezko familia handia egin da. Zelan hasi eta norarte heldu den ikustea izugarria da”. Garapena ageriko da.
“Familia handia” osatu dute, eta lau hamarkadetan jende askok egindako lana azpimarratu dute egungo zuzendaritza taldekoek. “Umeak 6-7 urtetik hasten dira, eta, eskola kirola adineko talde denetakoak bertoko jokalari gazte eta nagusiek entrenatzen dituzte. Hor harreman estu eta polita sortzen da denen artean. Artibai familia handi bat da”. Euren asmoa da orain arteko lan horregaz jarraitzea. Orain arte egindako bide beretik segitu gura dute.
Zenbaki eta datuez harago, Artibai sasoian ote dagoen galdetuta, “sasoirik onenean” dagoela erantzun dute. “Kirol arloari dagokionez, nagusiak Lurraldeko Lehen Mailan daude, orain dela urte batzuk Lehentasunezko Mailan egon zen taldea, baina, orokorrean esan genezake, orain momentua dela sasoirik onenean dagoena. Ume kopurua itzela da, ia entrenatzaile denak etxekoak dira, nagusietan ia jokalari denak ere etxekoak dira, emakumeen taldeari ere izugarrizko bultzada eman zaio eta neska gazte pila bat dabiltza berriro ere futbolean jokatzen… Familia handi hau sortu da azkenengo urteetan egin den lan piloagaz. Sasoirik eta momentu onenetakoan dagoela esan daiteke. Ez dakigu goia jo duen, baina zaila izango da sasoi hobean egotea. Behintzat egin den lana eta dagoen familia handi hau mantentzea da gure asmoa. Kirol arloa beste gauza bat da, eta guretzat ez da garrantzitsuena”.
“Orain arte egin den lana eta familia handi hau mantentzea da gure asmoa”
Aurtengo pregoiaren momentua “hunkigarria” izango dela badakite. Jaietako egunik bereziena edo kuttunena, baina, zalantzarik barik, Paella Eguna izaten dela nabarmendu dute: “Denontzat da bereziena. Markina-Xemeinek 5.000 biztanle dauzka, eta 2.800 pertsona elkartuko dira herri bazkarian aurten. Hori ikaragarria da. Egunik politena izaten da”.
Jaietara «gogoagaz eta ondo pasatzera» hurbiltzeko gonbidapena luzatu dute: “Parranda egin dezatela, baina neurrian, eta osasunez eta errespetuz”.
