Zabalik dago Berriatuko azokan izena emateko epea
Izena emateko azken eguna datorren asteko barikua [urriak 27] izango da. Azoka azaroaren 25ean egingo dute.
Azaroaren 25ean ekoizleen, artisauen eta animalien azoka egingo dute Berriatuan, 10:00etatik 14:00etara. Horrez gain, asteburuan ekintza ezberdinak ere egingo dituzte herrian.
Azokako postuan saldu ahal izateko baimena urriaren 27a baino lehen eskatu beharko da. Eskariak landagarapena@leartibaifundazioa.eus helbidera bidali beharko dira, edo Lea-Artibaiko Landagarapen elkartearen bulegoan aurkeztu beharko dira, astelehenetik barikura, 09:30etik 14:00etara bitartean.
Eskatzaileek hainbat baldintza bete beharko dituzte produktuen eta animalien postuak jarri ahal izateko. Elikagaien salmentarako postuetan, esaterako, ez dute birsalmentarik onartzen: salgai jartzen diren produktuak norberak ekoiztutakoak izan beharko dira. Horrez gain, legeak eskatzen dituen betebeharrak eguneratuta eduki beharko dituzte.
Artisauak, berriz, ekonomia jardueren gaineko zergan alta emanda egon beharko dira derrigorrez, eta aurkeztu egin beharko du. Horrez gain, kontutan hartuko dute erregistro-errolda edo artisau txartela edukitzea
Animalien kasuan, herriko animaliek lehentasuna izango dute eta dietak jasoko dituzte. Sei hilabetetik gorako behi, txahal eta idiek 115 euro jasoko dituzte buruko; zaldi, behor, mando, asto eta poniek 50 euro buruko; zazpi ardi eta ahari batez edo zazpi ahuntz eta aker batez osatutako aldrak 100 euro; eta ama eta kumeez osatutako txerrien aldrak 75 euro aldrako jasoko dituzte. Euskal arrazako etxe abereetan berriz, oiloak, untxiak, antzarrak, ahateak eta ahuntzak onartuko dituzte, eta bi eme eta ar bategaz osatutako lote bakoitzarengatik 50 euro jasoko dituzte. Azkenik, euskal artzain txakur bakoitzeko 20 eurokoa izango da dieta.
Animalien jabe bakoitzak nahi beste animalia eraman ditzakeen arren, abere mota bakoitzeko gehienez ere lau bururen dietak kobratuko ditu. Aipatutako animaliez gain, antolakuntzakoek adierazi dute bestelako animaliak ekartzeko aukera aztertu ahal izango dutela “beti ere, azkokan animalia klase gehiago erakusteko helburuagaz”. Oinarri guztiak eta eskaera orriak www.berriatua.org webgunean daude eskuragarri.
