Behar bezalako omenaldia eginda
Herritarren erantzuna paregabea izan da eta goi goitik ospatuta geratu da zapatuko [azaroak 11] Ondarroako Erain Kipuliai Eguna. Antolatzaileek eskerrak eman dizkiete laguntza eman eta parte hartu duten herritarrei.
Behar adinako omenaldia eginda eta herriaren aldetik erantzun paregabeagaz borobildu zuten zapatuan [azaroak 11] Erain Kipuliai Eguna. Jai giroa ez zen falta izan herrian eta goi goitik ospatuta geratu zen eguna.
Anaitasuna taberna eta Kapone omentzeko antolatutako egun osoko egitarauari heldu zioten eguerdian, eta eguraldia lagun ez zuten arren, horrek ez zuen inor gelditu. Eskuak astinduaz batera danbor hotsek herritarren arreta bereganatu zuten: egunagaz hasteko modu ezin hobea.
Eguerdian 100 lagunek zuten hitzordua Berdura plazako mahai inguruan jarri eta jan-edanean eguerdiaz gozatzeko, eta hala egin zuten. Gainera, marmitakoa ez zen soilik bazkariko lagunentzako prestatu, Zaharren Egoitzara ere ailegatu baitzen kazolakada bat.
Iluntzean galdu ezinezko hitzordua ailegatu zen; Jake Mate taldea eta Gominolsek Berdura plaza astindu zuten, eta jendeak ez zuen hutsik egin, erantzuna paregabea izan baitzen.
Antolatzaileek eskerrak eman nahi dizkiete laguntza eskaini dieten guztiei eta baita parte hartu zutenei ere: “Eskerrak eman nahi dizkiegu Plazagainekoei materiala lagatzeagatik, Marinotarrei atunagatik, Joseri izotza ematearren eta, nola ez, herriari, jaian parte hartu eta egun hau gauza handi bat bihurtzearren”.
