Belaunaldien arteko irakurketa kluba antolatu dute Lekeitioko udal liburutegian
Lehenengo saioa otsailaren 29an egingo dute; 'Esnearen kolorekoa' liburuaren inguruan ariko dira. Klubean parte hartzeko izena eman behar da.
Lekeitioko udal liburutegiak belaunaldien irakurketa kluba antolatu du, “irakurzaletasuna eta belaunaldien arteko harremana sendotzeko eta bultzatzeko asmoz”.
Lehenengo saioa otsailaren 29an egingo dute, 19:00etan, kultur etxean. Nell Leyshon idazlearen Esnearen kolorekoa izango da urteko lehen irakurketa: “Hamabost lagun inguru elkartzea da asmoa, aukeratutako liburuaren inguruan hausnartzeko eta suertatzen diren gaiak lantzeko: historia, memoria, gaur egungo gai esanguratsuak… Helburua herriko erakunde eta pertsona desberdinak harremanetan jartzea da, liburuen bitartez”.
Dinamitzatzaile lanak Iñigo Aranbarri idazle azkoitiarrak egingo ditu: “Aranbarrik iaz horrelako beste saio bat gidatu zuen, eta arrakastatsua izan zen. Horregatik uste guru bera egokia dela belaunaldien irakurketa kluba dinamizatzeko”. Otsaileko saioaz gain, apirilean eta azaroaren ere irakurketa kluba egingo dute; data zehatza aurrerago jakinaraziko dute. Klubean parte hartzeko izena eman behar da lekeitio@liburutegia.eus helbide elektronikora idatziz.
Liburu artean. Urtebete liburutegian proiektua jarri dute martxan, eta hainbat ekintza antolatuko dituzte urte guztian bi ildo nagusitan banatuta. Alde batetik, asteroko saioak egingo dituzte eta bertan, besteak beste, ipuin kontalarien saioak, liburuen aurkezpenak eta mahai inguruak egingo dituzte. Bestalde, urtaroetako saioak egongo dira: “Hor sartuko litzateke belaunaldien arteko irakurketa kluba”.
Horrez gain, azaldu dute Andraetxean ere irakurketa taldeak antolatzen dituztela. Hurrengo saioa otsailaren 27an egingo dute Uxue Alberdiren Dendaostekoak liburuaren inguruan; dinamizatzaile lanetan Ane Labaka ariko da eta idazlea bera ere bertan egongo da.
