SF-Haitzazko Oroimenezkoa, asteburuan
Zapatuan [martxoak 9] Markina-Xemeinek elite eta 23 urtez azpikoen tropela eta Euskaldun Torneoko hirugarren proba hartuko ditu. 117 kilometroko ibilbide gorabeheratsua egin beharko dute ziklistek.
Asteburuan, Euskal Herriko afizionatu mailako txirrindulariek hitzordu garrantzitsua edukiko dute Markina-Xemeinen, herriko txirrindulari elkarteak antolatuta: zapatuan [martxoak 9] 33. Sabin Foruria-Haitzasko Oroimenezkoa lehiatuko dute, 09:45ean hasita. Elite eta 23 urtez azpiko ziklistek parte hartuko dute lasterketan, eta Euskaldun Torneorako baliagarria izango da; hain zuzen ere, txapelketa horretako hirugarren proba puntuagarria izango da Markina-Xemeingoa, Zumaiakoaren eta Ereñokoaren ondoren. Azken lasterketa horretan maisuki gailendutako Caja Rural-Alea etxeko Hugo Aguilar madrildarra da, egun, lehiaketako liderra; bigarren postuan Finisher taldeko Sergio Romeo asturiarra dago eta hirugarrena, ostera, Caja Rural-Aleako Lucas Joseph Towers da.
117 kilometroko ibilbide gorabeheratsu eta teknikoari aurre egin beharko diote parte hartzaileek. Markina-Xemeindik Ondarroara eta Lekeitiora joko dute, ihesladietarako eremu aproposetatik; jarraian, Gontzugaraigane mendatea igoko dute Munitibartik. Mendiko sailkapenerako lehen aldapa puntuagarria izango da 45. kilometroan igoko duten hori. Bigarrena, aldiz, Plazakolatik igoko duten Milloi izango da, 61. kilometroan iritsiko zaiena.
Lekoitz Ganeko mendatea eta Gontzugaraiganeko azken pasaera izango dira ibilbideko epaileak
Gontzugaraiganeko bigarren pasaerak (83. kilometroa) gogortasun gehigarria emango dio lasterketari, unerik erabakigarrienera ailegatu orduko: Lekoitz Ganeko mendatea. 94. kilometroan igoko dute koska hori, Markina-Xemeingo aldetik; aldaparen gailurra harrapatu ostean, Aulestira jaistea eta Gontzugaraigane azkenengoz gainditzea (107. kilometroa) baino ez zaie geratuko txirrindulariei, Markina-Xemeingo Aldaola kaleko helmuga harrapatzeko.
Iazko lehen hiru sailkatuetako hiru profesional mailan dabiltza egun, probaren mailaren erakusle
Hiru ordu inguruko lasterketa izatea aurreikusi dute antolatzaileek, 40 kilometro ordu inguruko abiaduragaz. Gaur-gaurkoz, 150 txirrindulari inguru daude izena emanda; tropela, gehienez jota, 200 lagunekoa izango da. Iazko ekitaldian, Telcom ON Clima Oses etxeko Marc Cabedo nagusitu zen; Caja Rural-Aleako Julen Arriola-Bengoa izan zen bigarrena, eta Laboral Kutxa-Euskaltel Euskadi Fundazioa etxeko Iker Mintegi hirugarren postuen helmugaratu zen. Hiru horietatik bi profesional mailan daude egun, probak duen mailaren erakusle: Arriola-Bengoa Caja Rural-Seguros RGA taldean dabil, eta Mintegi Euskaltel-Euskadin.
