Zaintzak erdigunera ekarri nahi dituzte ostera ere
Gaur [martxoak 8] da Emakumeen Nazioarteko Eguna eta goizetik hasi dituzte ekimenak herrietan, batzuetan dagoeneko elkarretaratzeak egin dituzte eta besteetan arratsalderako kaleak apaintzen ari dira.
Martxoak 8ko elkarretaratzea Mendexan Agerikoa da gaur [martxoak 8] Emakumeen Nazioarteko Eguna dela: kolore moreak kaleak hartu ditu goizetik, baita Lea-Artibain eta Mutrikun ere. Mobilizazio nagusiak, batez ere herri handienetan, arratsaldeak egingo badituzte ere, goizean ere egin dira.
Mendexan, adibidez, herriko plazan elkartu dira apaintzeko eta herritarrek elkarretaratzea egin dute. Hain zuzen ere, arratsaldean ere egingo dute 17:00etatik aurrera. Mendexatik hurbil, Lekeition, herriko kaleak apaindu dituzte 20:00etan Eskolapetik aterako den manifestaziorako. Mutrikun, berriz, herriko gazteenek hartu dute Goiko plaza, eta Harro gaude! lelopean elkartu dira Mutriku BHI-ko ikasleak. Arratsaldean, ostera, adin guztietako mutrikuarrak elkartuko dira 18:30etatik aurrera.
