Bat egin dute Lekeitioko eta Herrialde Katalanetako deabruek
Hospitalet de Llobregaten egon dira Lekittoko Deabruak, TRO taldearen 25. urteurren ospakizunean. "Oso esperientzia positiboa" izan da lekeitiarrentzat, eta pozez itzuli dira Lekeitiora.
Argazkia: Lekittoko Deabruak. Deabruek hartu zuten zapatuan [apirilak 6] Kataluniako Hospitalet de Llobregat, eta nola ez, Lekittoko Deabruek ere euren tokia izan zuten bertan. Guztira 38 talde desberdinetako 1.200 deabru baino gehiago elkartu ziren bertan, Trobada de Diables dels Paisos Catalans ekimenean parte hartu eta TRO taldearen 25. urteurrena ospatzeko asmoz. Egun guztiko egitaraua esku artean, Lekittoko Deabruek ere euren aletxoa jarri zuten bertan, ikuskizun bat eskainiz.
Lekittoko Deabruek Katalunia askotan zapaldu duten arren, zapatukoa bezalako ekimen batean ez dute inoiz parte hartu, eta pozez hartu zuten bertan parte hartzeko deia: “Egia esan, oso aberasgarria izan da, jende mordoa ezagutu dugu, eta ikasketa modura sekulakoa izan da. Talde desberdinekin harremanetan jartzeko sekulako esperientzia izan da, oso positiboa”. Kataluniako taldeak ez ezik, Herrialde Katalanak euren osotasunean hartzen saiatu zirela antolatzaileak, eta eurekin batera Balear uharteetako, Valentziako eta Kataluniako taldeek parte hartu zuten: “Ederra izan da horrelako ekintza batean parte hartzeko aukera izatea”.
Argazkia: Lekittoko Deabruak.
