EH Bilduk "aldaketa garaia orain" dela aldarrikatu du Lekeition
Joan den domekan [apirilak 7] hauteskunde kanpainako ekitaldia egin zuen EH Bilduk Lekeition. Datozen egunetan beste hainbat ekitaldi egingo dituzte eskualdean.
Argazkia: EH Bildu. Hauteskunde kanpainan bete-betean sartuta, EH Bilduk ekitaldia egin zuen joan den domekan [apirilak 14] Lekeitioko elizapean. Hizlari lanetan aritu ziren Oihana Etxebarrieta eta Arkaitz Rodriguez. Eurekin batera, nola ez, bertan izan ziren Lea-Artibaiko EH Bilduko ordezkariak ere.
Bai Rodriguezek eta baita Etxebarrietak ere, pil-pilean dauden gaiei heldu zieten. Hala aldarrikatu zuen Etxebarrietak: “Soluzio, gehiengo eta lidergo berriak behar ditugu. Nork jarriko du berriro zutik Osakidetza? Nork konponduko du etxebizitzaren arazoa? Nork lideratu behar du trantsizio digitala? Nork lideratu behar du trantsizio energetikoa?”.
Gai horiekin batera, Rodriguezek hizkuntza politika baten beharra ere nabarmendu zuen: “Herri sena, herri hau badela eta izan nahi duela erakutsiko duen neurriak hartuko ditugu. Euskal kulturak eta euskal sortzaileek merezi duten tokia izateko konpromisoak hartu ditugu”.
Hori horrela, aldaketa egiteko momentua “orain” dela irmoki esan zuten biek: “Aurrean ditugun erronkak handiak dira, baina, izugarrizko konfiantza dut egin ahalko dugula, elkarrekin, elkar babestuz, ilusioz eta konpromisoarekin ari garelako. Lortu dezakegu, imaginazioz, lanez, amets eta ekimenez, elkarlan eta elkarzaintzaz. Gure momentua da, aldaketa garaia orain da”.
Herritarren erantzunagaz, pozik. Lekeitioko EH Bilduko ordezkariak pozik agertu dira ekitaldiak izan duen erantzunagaz: “Herritarren aldetik erantzun ona izan zuen ekitaldiak, kontuan izanda aurreko egunean Athleticen partidua izan zela. Parte hartze handia ikusi genuen, ez bakarrik ordezkari politikoak eta herritarrak, eskualdetik ere jendea etorri zen”.
Lekeitioko ekitaldiaren ostean, beste hainbat ekitaldi egingo ditu EH Bilduk eskualdeko hainbat herritan:
- Berriatua. Bihar [apirilak 10], 17:00etan, herriko plazan. Ondoren, Ondarroako ekitaldira joango dira.
- Ondarroa. Bihar [apirilak 10], 19:00etan, Alamedan. Oihana Etxebarrieta eta Julen Arzuagagaz.
- Markina-Xemein. Apirilaren 12an, 19:00etan, Arkupean (eguraldi txarragaz, Kontzejupean). Julen Arzuaga eta Iratxe Lasagaz.
