Domekan egingo dute Markina-Xemeingo 58. ibilaldi neurtua
Ibilbide luzea eta laburra egongo dira aukeran. Izena eman behar den arren, doan izango da parte hartzea. Amaieran zozketa egingo dute.
Badator beste behin ere Artibai Mendigoizale elkarteak urtero antolatzen duen ibilaldi neurtua. Aurtengoan, 58.a izango da, eta ohi bezala bi ibilbide izango dituzte aukeran parte hartzaileek Alde batetik, ibilbide luzea 26,4 kilometrokoa izango da, eta 07:30ean abiatuko da Opela okindegitik (Atxondoa, 4). Bestalde, ibilbide laburra egin nahi dutenek 10,2 kilometrokoa egingo dute, Bizkaibus geltokitik abiatuta, 09:30ean. Izen ematea egunean bertan izango da, irteera ordua baino ordu erdi lehenago, ibilbidea hasiko duten toki berean.
Ibilbide luzea aukeratzen dutenek bi tontor igo beharko dituzte: Bedartzandi (700 metro) eta Motrollo (591 metro). Markina-Xemeinen hasi eta Bekobentarantz abiatuko dira mendizaleak eta Txepetxabixetik igoroko dira Bedartzandira. Hortik Santa Eufemiko zelaia igaro, eta Urriolatik Motrollora igoroko dira. Azken txanpan, Zeinke-Ziarregirantz joan, eta Kareaga industrialdea pasata berriro ere Markina-Xemeinera itzuliko dira.
Ibilbide laburra aukeratu dutenek, berriz, Ziortzako Monastegian hasi eta Zeinke-Ziarregirantz joango dira. Gontzugarai mendatea pasa, eta Zeinke-Ziarregirako bidea hartuko dute. Hortik aurrera, ibilbide luzekoekin bat egin eta Markina-Xemeinera itzuliko dira.
Eguraldiak zeresan handia izango duen arren, antolatzaileek 300 lagunetik gora espero dituzte: “Erantzun oso ona edukitzen du, klasiko bat bihurtu da”. Aurtengoan bereziki azpimarratu nahi izan dute norberak bere edalontzia ekartzearen garrantzia: “Edalontzi asko erabiltzen ditugu. Aurten udaletxeak dituen edalontzi berrerabilgarriak eskatu ditugun arren, bakoitzari berea ekar dezan deia egin dugu, ahal den zikin gutxien sortzeko. Ea apurka-apurka ohitzen garen norberak bere edalontzia erabiltzera”. Bestalde, ibilbidea, ohi bezala, seinaleztatuta egongo da, eta amaieran bertoko produktuen zozketa egingo dute.
