Bazkidetza kanpaina martxan dauka Leargik
100 lagun hurbildu ziren apirilaren 12an ipinitako aurkezpen hitzorduetara; kooperatibaren helburuak eta hurrengo jardunak azaldu zituzten.
Argazkia: Leargi Leargi Kooperatibak proiektuaren aurkezpenak egin zituen apirilaren 12an Lea Ibarrako herrietan, eta herritarren harreta bereganatu zuten 100 lagun inguruk parte hartu baitzuten. Amoroton, Aulestin, Gizaburuagan, Mendexan eta Munitibarren egindako aurkezpenean irabazi asmorik gabeko Lea Ibarreko Energia Berriztagarrien Komunitatearen helburuak eta martxan ipiniko dituzten eguzki energiaren bidezko autokontsumo partekatuko proiektuak azaldu zituzten.
Kooperatibako kideek azaldu zutenez herrietako puntu zehatzetan ipiniko diren ekoizpen puntu gutxi batzuetatik, “ahalik eta herritar gehienentzako energia garbiaren onura eta aurrezpena” lortzea da helburua, horretarako neurrizko azpiegiturak ipinita. “Helburua izango da ekoiztuko den energiaren gehiengoa, bertan, momentuan, autokontsumitzea; ahalik eta gutxien alferrik galduz, eta ahalik eta gutxien tiratuz sare orokorretik”.
Amoroton egindako aurkezpena. Argazkia: Leargi
Kooperatibaren funtzionamendua bermatu eta lehenengo proiektuaren instalazioak ordaintzeko oinarrizko kuota bat ipiniko dute, kontsumoari lotuta joango den kuota bat. “Bazkide bakoitzari, daukan energia kontsumoaren arabera, instalazio partekatuetako lote kopuru bat esleituko zaio eta lote kopuruaren araberako kontsumo kuota ordainduko dio Leargiri, beti ere, ohiko komertzializatzaileen prezioa baino nahikotxo merkeagoa. Horregaz batera, instalazioetatik zenbat eta gehiago autokontsumitu, orduan eta onura handiagoa atarako dute bazkideek. Beraz, bi aldeetatik lortuko dute aurrezpena”.
Hasierako instalazioak egiteko udalek edo mankomunitateak egiturak ordaintzea proposatu zuten, eta horien kudeaketa hitzarmen bidez Leargirekin lotzea. “Hitzarmen horiek zelan egin, juridikoki aztertzen ari gara”. Horrez gain, Leargiko bazkide eta inbertsoreen ekarpenen bidez inbertsioak aurreratzeko planteamendua ere proposatu zuten.
Gaur egun 96 bazkide ditu Leargik, eta bazkidetza kanpaina martxan ipini du; maiatzaren 31ra arteko epea zabaldu dute. “Zenbat eta bazkide gehiago izan hobeto dimentsionatuko ditugu instalazioak hasieratik, eta inbertsioak ere merkeagoak izango dira”. Bazkidetza orriak eskuratzeko eta entregatzeko puntuak ipiniko dituzte Lea-Ibarrako herrietan eta hurrengo egunetan jakinaraziko dituzte hitzorduak.
