1,3 milioi euroko aurrekontua izango du Aulestiko Udalak, iazko antzekoa
Etxebizitza beharraren azterketa, gimnasioko materiala berritzea, eskolako karpan hobekuntzak egitea, ibilgailu berria erostea, seinalizazioa hobetzea, auzo bideak berritzea eta sagu zaharren etxola berritzea dira aurtengo proiektuak.
Iazko aurrekontuaren antzeko aurrekontua onartu du Aulestiko Udalak, zehazki, 1.359.322,74 eurokoa. “Urtarrileko osoko bilkuran behin-behineko onarpena eman genion aurtengo aurrekontuari, aho batez. Ostean, alegazio epea zabaldu eta gero, behin betiko onarpena eman zaio”.
Zazpi proiektu ipini dituzte erdigunean, hain zuzen ere, aurrekontuan osorik aurreikusten diren proiektuak izanik. Etxebizitza beharraren azterketa, gimnasioko materiala berritzea, eskolako karpan hobekuntzak egitea, ibilgailu berria erostea, seinalizazioa hobetzea, auzo bideak berritzea eta sagu zaharren etxola berritzea dira proiektuak.
Aulestiko biztanleriaren zein bizikidetza unitateen gaur egungo ezaugarriak aztertuko dituzte.
Lehenengo proiektuak Aulestiko biztanleriaren zein bizikidetza unitateen gaur egungo ezaugarriak aztertzea eta etorkizun hurbileko egoera aurreikustea izango du helburu, horretarako metabolismo demografikoaren eta etxebizitza beharraren azterketa eginez. “Ezagutza hori baliatuta udalerriko etxebizitza parkearen ezaugarriak, honen erabilera maila eta hurrengo urteetako etxebizitza beharrak zenbatekoak izan daitezkeen zehaztuko da”. Kirol arloan, ostera, gimnasioko erabiltzaileek eta inguruan egiten diren ikastaroetako erabiltzaileen eskaeretatik abiatuta kirol gunean material berria ipiniko dute. Udal zerbitzuei dagokionez, egun dagoen Land Roverra ordezkatuko duen ibilgailu berria erosiko dute, “egokirik bilatu ezkero”.
Iturritze beherako, Goikoetxebarrirako eta Agarrerako bideak konponduko dituzte.
Hirigintza alorrean hainbat proiektu zehaztu dituzte eta horien artean dago auzo bideak konpontzeko proiektua; zehazki, Iturritze beherako, Goikoetxebarrirako eta Agarrerako bideak konponduko dituzte. Horretarako Ustekabeak dirulaguntzagaz baliatuko dira. “Beste partida bat ere badago gordeta auzo bideetan behar diren hobekuntzak egiteko”. Horrez gain, bideetako seinale bertikalaz zein horizontalak berrituko dituzte. “Lurreko pintura gastatuta dagoen lekuetan berriro margotuko dira, eta auzoetako seinaleak, etxebizitzak seinalatzen dituztenak berritu egingo dira”.
Horrez gain, eskolako kapari toldo berria ipiniko diote eta alboetako errezeletik hornituko da. “Udalaguntza dirulaguntza eskabidea eginda dago”. Azkenik, Angizen dagoen sagu zaharren etxola egokitzeko lanekin jarraituko dute. “EHUko eskaera bati erantzunez, galtzeko zorian dagoen sagu zahar espezie baten biziraupenerako Iberdrolak utzitako etxola egokitzeko iaz hasitako lanekin aurrera jarraituko da”.
Proiektu horiez gain, beste bost proiektu mahai gaineratu ditu aurrekontuak, baina dirulaguntzen menpeko proiektuak dira, hortaz, aurrerago zehaztuko dute proiektu horiek aurrera eramango diren edo zein egoeratan geratuko diren.
“Herriko ondarea zaintzeko helburuagaz atera da proiektua”.
Nareako saneamenduaren bigarren fasea dago aipatutako proiektuen artean. Bigarren faseak uraren hodiak auzoaren gorengo aldera eramango ditu eta aurreko fasean egin bezala, bidea zerbait zabaltzeko aprobetxatu nahi dituzte lanak. “Bigarren fase hau gauzatu ahal izateko, Erein dirulaguntzetara aurkeztu du Udalak proiektua, eta horren ebazpenaren arabera gauzatuko da”. Atxagarai aterpetxeari dagokionez, hezetasuna kendu, leiho berriak ipini, komuna irisgarri egin eta espazioa gozotzeko lanak egitea aurreikusten da.
Bizkaiko Foru Aldundiaren dirulaguntzen ebazpenaren zain dauden bi proiektu ere zehaztu dituzte; Eskola paretik Ibekatxeko bidegurutzerainoko bidea konpontzekoa eta frontoian eguzki plakak jartzeko proiektua.
Azkenik, prozesu luze baten menpe egongo den proiektua azaleratu dute: Iturgun harraska konpontzeko proiektua. “Herriko ondarea zaintzeko helburuagaz atera da proiektua. Aldundian batzartu ginen, eta hango jarraibideei kasu eginez, ondare balio eta esku hartze irizpideen balorazioa eskatu dugu. Prozesu luzea izango denez, ez dakigu aurten ala datorren urtean gauzatuko den”.
