300 parte hartzaile baino gehiago izan ditu Ispasterko mendi bizikleta lasterketak
Green Series txapelketako hirugarren geralekua izan zen domekan [apirilak 21] Basokoetxe industriagune ondoko zirkuitua.
Hamarkada bat eta gero Ispasterko Ipargorri txirrindulari elkarteak mendi bizikleta lasterketa antolatu du. Hain zuzen ere, Green Series Txapelketako hirugarren proba jokatu zen domekan [apirilak 21] Basokoetxe industriagune ondoko zirkuituan. 300 txirrindularik baino gehiagok parte hartu zuten, maila desberdinetan banatuta.
Elite mailan Iraneko Faranak Partoazar (1:28:40) eta Frantziako Julien Herman (1:25:35) nagusitu ziren. Antolatzaileek txirrindularien “maila handiak eta kopuruak” erakusten du Ispasterko lasterketa “arrakastatsua” izan dela. “Oso pozik gaude jasotako erantzunagaz denen aldetik, parte hartzaile zein herritarrengandik. Izen handi askok parte hartu du eta leku desberdinetakoak, Frantzia edota Nafarroatik, adibidez. Eguraldia lagun izan dugu eta asko izan dira bertaratu direnak”.
Eskualdeko hainbat ordezkari ere bertan izan ziren. Denek ala denek zirkuituaren egoera “bikaina” nabarmendu zuten ez zegoelako “basa askorik” eta mendi bizikletan aritzeko lurra “ezin hobeto” zegoelako. Horrez gain, lehen aldiz Ispasterko zirkuituan aritu zirenak azpimarratu zuten ibilbide “bikaina eta entretenigarria” dela eta oso harrera ona izan zuen.
Arrakasta ikusita, Ipargorri txirrindulari elkartetik datorren urtean errepikatzeko asmoa erakutsi dute. “Dagoeneko badaude pentsatzen zer hobeto dezakegun, beti dagoelako zerbait. Ez da istripurik egon eta sortutako giroagaz batera uste dugu oso arrakastatsua izan dela”.
Hurrengokoak dira mailak eta irabazleak:
- Elite/U23 emakumeak: Faranak Partoazar (1:28:40)
- Junior emakumeak: Manon Chapon (1:18:39)
- Kadete emakumeak: Ane Zubeldia (1:01:51)
- Kadete gizonak: Raul Lopez (1:03:32)
- Junior gizonak: Lucas Salierno (1:14:30)
- Maestro 30: Iñaki Carro (1:18:16)
- Maestro 40: Isaac Suarez (1:03:30)
- Maestro 50-60: Jose Luis Iñorbe (1:08:27)
- Elite/U23 gizonak: Julien Hemon (1:25:35)
