Aritz Abaroa: "Beste behin ere, Bizkaia, Araba eta Gipuzkoak egonkortasuna aukeratu dute"
Bermeotarra Eusko Legebiltzarrean egongo da datozen lau urteetan, eta bere berbetan, "inoizko Eusko Legebiltzar abertzaleena" izango da. Gizarteak konfiantza erakutsi diela nabarmendu du, eta "EAJ EH Bilduk izan duen olatuari eusteko gai izan dela".
EAJ izan da alderdi bozkatuena Eusko Legebiltzarrerako hauteskundeetan, baina lehenengoz eserlekuetan berdindu du EH Bildugaz; 27na lortu dituzte. Duela lau urteko emaitzekin alderatuta, botoetan gora egin dute jeltzaleek —20.594 boto gehiago—, baina ordezkaritzan, berriz, behera, lau eserleku galdu baitituzte. Gauzak horrela, hauteskundeen “irakurketa positiboa” egin du EAJk. “Euskal gizarteak berriro ere konfiantza erakutsi dio EAJri”, adierazi du Aritz Abaroak, datozen lau urteetan EAJren legebiltzarkide izango denak.
Lehen bi indarren arteko boto aldea nabarmen murriztu da 2020ko hauteskundeekin alderatuta: duela lau urte jeltzaleek 100.000 boto atera zizkioten koalizio subiranistari; aurten, berriz, 28.819 boto. Abaroaren esanetan, balorazioa positiboa bada ere, euskal gizarteak “proiektuak lantzen” eta beste taldeekin “adostasunak bilatzen” jarraitzeko eskatu die jeltzaleei.
“Beste behin ere, Bizkaia, Araba eta Gipuzkoak egonkortasuna aukeratu dute”, adierazi du bermeotarrak. Era berean, jeltzaleek egonkortasun horretan oinarritutako “gobernua eta gobernu programa lantzen saiatu” behar direla azpimarratu du.
Argazkia: Bermeoko EAJ
Hauteskundeetako emaitzen irakurketa egitean, euskal gizarteak “gizarte abertzalea” dela argi utzi izana nabarmendu du Abaroak; izan ere, “inoizko Eusko Legebiltzar abertzaleena” izango da datozen lau urteetakoa. Horrek “orain arte hasitako bidetik” jarraitzeko aukera emango diela aitortu du: “Gure autogobernua sendotzen jarraitzeko aukera emango digu, gure nazio izaeran urratsak ematen jarraitzeko, eta ondorioz, euskaldunon bizi-kalitatea hobetzen segitzeko”. Modu berean, bestelako indar ezberdinekin “adostasun oso zabalak” bilatzeko aukera ere izango dutela uste du.
Busturialdean ere behera egin du jeltzaleen boto kopuruak, baina Abaroaren hitzetan, “EH Bilduk izan duen olatuari eusteko gai izan da EAJ”, eta gizarteak konfiantza erakutsi die: “Bermeon, adibidez, irabazi egin dugu, beraz, gure irakurketa zera da: gure eskualderako proiektuak lantzen jarraitzeko eskatu digu biztanleriak; gure eskualdearen aldeko apostua egiten eta ditugun proiektuak azaltzen jarraitu behar dugula adierazi digu, jendeak ondo ulertu dezan zein den EAJren apustu hori”. Era berean, alderdiak bide horretan lanean segituko duela iragarri du, “bai herriz herri, bai eskualde moduan, bai Bizkaian eta bai Euskal Herri osoan”.
Legebiltzarkidea.
Eusko Legebiltzarrerako hauteskundeetan EAJko hautetsia izan da Abaroa, zehazki, Bizkaiko zerrendan, hamaikagarren. Behin emaitzak jasota, legebiltzarkide izango dela ezagutu zuen bart gauen bermeotarrak, eta eskerrak emateagaz batera, herritarrak ordezkatzeko gogoa erakutsi du: “Eskerrak eman nahi dizkiet botoa eman diguten bizkaitar guztiei, bereziki bermeotarrei, herrian emaitza onak atera ditugulako, baita Busturialdeko bizilagunei ere”. Hauteskunde kanpainan adierazi modura, “orain arte egin bezala zintsotasunez, leialtasunez eta gogoz beterik”, bermeotarren zein eskualdeko andra gizonen ahotsa legebiltzarrean ordezkatzeko “onena emateko prest” dagoela nabarmendu du: “Benetan ohore bat da, horregatik, eskerrak eman nahi ditut apaltasun osoz”.
