Kultura ezberdinen elkargunea izan da LAIkoloreak ekimena
Lea Artibai Ikastetxearen ekimenez lanbide ikastaroetako ikasleek hamar postu jarri zituzten barikuan [apirilak 19]. Antolatzaileek egunaren balorazio "oso positiboa" egin dute: "Aberasgarria eta interesgarria izan da".
Argazkia: Lea Artibai Ikastetxea. Eskualdean dagoen kultur aniztasuna erakutsi eta ezagutarazteko asmoagaz antolatu du aurtengoan ere Lea Artibai Ikastetxeak LAIkoloreak ekimena, eta ezin arrakastatsuagoa izan da beste behin ere. Guztira hamar postutan banatuta, kulturen eta produktuen elkartrukea egiten pasa zuten bariku [apirilak 19] goiza bertaratu ziren herritarrek eta ikastetxeko ikasleek.
Izan ere, lanbide ikastaroetako ikasleak izan ziren postuen arduradunak: “Hamar postu egon ziren, hamar lanbide ikastarotako ikasleekin. Denetariko produktuak ipini zituzten ikasleek, herrialde desberdinetako ikasleak daude eta”. Kolonbiarrak, marokoarrak, euskaldunak… denetariko kulturak elkartu ziren bertan, eta denetariko jakiak dastatzeko aukera eman zieten markina-xemeindarrei: “Tortilla patata, tahin, kuskusa, tea, jakin gozoak, gaziak… Polita izan zen”.
Kultura ezberdinak elkartzeko jaia izanik, ikastaroetako herrialde desberdinetako ikasleen arteko harremanak estutzeko ere balio izan zuen jaiak: “Soldadurako ikasleek parrilla bat egin zuten, eta alboan zeuden harakintzako ikastarokoek, berriz, hanburgesak. Hala, eurek egindako txahal okela eta oilasko hanburgesak egin zituzten soldadurakoen parrillan”.
Postuak gutxi ez, eta beste hainbat ekintza ere egin zituzten: “Bertsolaritza eta senegalgo tinbalak fusionatuta emanaldia ere eskaini zuten ikasleek, herrialde desberdinetako jantzi tradizionalak ere eroan zituzten batzuk… Beste postu bat ere eduki genuen guk etxean ditugun eta erabiltzen ez ditugun gauzekin: erropak, liburuak, boltsak… Dena agortu ez zenez, gelditu direnak errefuxiatuen taldeari emango dizkiogu”. Herri kiroletan aritzeko aukera ere eduki zuten ikasleek, sokatiran eta fardo jaurtiketan: “Eguna oso ondo joan zen, ikasleentzako aberasgarria eta interesgarria izan zen. Denborak gehiagorako ematen ez zuelako, bestela gauera arte egongo ginatekeen”.
Argazkia: Lea Artibai Ikastetxea.
