Ortugintzan aritzeko gakoak ikasi dituzte Lekeition
Zapatuan [apirilak 20] ortugintza ikastaroa antolatu zuen Lekitto Bedarrak. Gabino Murua adituaren azalpenekin saio teorikoa eta praktikoa egin zuten. Eguaztenean [apirilak 24] Sosoaga dolarea txukuntzeko auzolana egingo dute; ortugintzaren bigarren saioa maiatzaren 11n izango da.
Argazkia: Lekitto Bedarra. Zapatuan [apirilak 20] ortuaren bueltan elkartu ziren lekeitiarrak. Lekitto Bedarrak ortugintza ikastaroa antolatu zuen ortua ipini nahi dutenei kontuan hartu beharrekoak azaldu zizkien Gabino Murua aditu gabiriarrak: “Guztira 23 partaide izan ditugu. Gehienak lekeitiarrak izan diren arren, Berriatuko Asterrika auzoko asko ere etorri dira, eta baita Zornotza, Mendexa eta Ondarroatik ere. Oso ondo baloratu dute saioa parte hartzaileek. Antolakuntza bikainaz gain, Muruaren azalpen erraz eta ulergarriak gustatu zaizkie. Ikastaro berriak antolatzeko proposamenak ere jaso ditugu”.
Hori horrela, hainbat azalpen eman zituen Muruak: “Elikagai ekologikoak sortzearen garrantziaz aritu zen, eta baita ortu bat sortzeko beharrezkoak diren kontuei buruz ere. Azken atal hau sakontzeko lurreko ph-aren garrantziari buruz ere aritu zen: lurreko mineral eta ongarriak, errotazioen beharra, asoziazioak, norbere lejia zelan egin, haziak zelan erein…”.
Azkue Ikastolan eman zuten zati teorikoa, eta ostean, praktika landu zuten: “Usotegin dauden berduren analisia egin du Muruak. Aholku zehatzak eman ditu hobekuntzak lortzeko”. Amaieran, gainera, haimaiketakoa egin zuten partaide denek: “Hamaiketakoa egiteaz gain, hainbat tomate cherry oparitu genizkien”. Ikastaroak jarraipena edukiko du, eta maiatzaren 11n elkartuko dira bigarren saioa egiteko; ordu zehatza eta landuko dituzten puntuak aurrerago jakinaraziko dituzte”.
Auzolana, ardatz. Ikastaroaren bigarren zatiaren aurretik, ordea, guaztenean [apirilak 24] elkartuko dira Lekitto Bedarrako kideak: Lekeitio Lagunkoia taldekoekin batera auzolan ekintza bat egingo dute. 17:00etatik 19:00etara Lekeitioko Santa Elena ermitan dagoen Sosoaga dolarea txukuntzeko lanak egingo dituzte. Tokia garbitzeaz gain, atea eta baranda margotuko dituzte: “Ezin da dolarea bisitatu, ez dagoelako egoera onean. Berriro zabaldu ahal izatea da helburua”. Lagundu nahi duten guztiei bertaratzeko deia luzatu diete antolatzaileek: “Auzolana elkarbanatuz etorri zaitez ondo pasatzera! Belaunaldi ezberdinetako jendeagaz batu, elkar ezagutu eta arratsalde eder bat pasako dugu”. Jakianarazi dute ez dela ezer eroan behar, garbiketarako erropa egokia baino ez.
Argazkia: Lekitto Bedarra.
