Gael Fayeren 'Ene herri txikia' liburua aztertuko dute Liburuen Amuaken saioan
Zapatuan [apirilak 27] egingo dute apirileko saioa, Joxemari Urteagaren gidaritzapean 10:00etatik 12:00etara, liburutegian. Maiatzaren 25ean egingo dute ikasturteko azken saioa.
Apirilaren amaieragaz batera, bueltan da Liburuen Amuak irakurle taldearen hilabeteko hitzordua. Hain zuzen ere, zapatuan [apirilak 27], 10:00etatik 12:00etara egingo dute, udal liburutegian. Gael Fayeren Ene herri txikia liburua izango dute aztergai. Ohiko formatuari eutsiko diote eta literatur zaleak Joxemari Urteagaren gidaritzapean bi orduko saioa osatuko dute.
Idazlearen lehen eleberria 2016an argitaratu zuen eta arrakasta handia izan zuen. Kritika onak jasotzeaz gain, Goncourt Akademiak 2016ko sarirako hautatu zuen. 2019an euskaratu zuen Irati Bereauk eta Igela argitaletxeak argitaratu zuen. Gero, Petit pays izeneko film egokitzapena egin zuten 2020an, Éric Barbierek zuzendua eta Gaël Fayerekin batera idatzitakoa. Ruandan filmatu zen.
Egileak azpimarratzen du eleberria ez dela autobiografikoa, bere istorioan inspiratuta baizik. Faye, aita kolono frantsesa eta ama Burundin bizi den ruandar tutsi emigratua izanik, 1994ko hutuen eta tutsien arteko gerra-genozidio erabatekoan harrapaturik suertatu zen umea zelarik. Ikasturteko azken saioa, maiatzaren 25ean egingo dute eta idazleak parte hartuko du solasaldian, hain zuzen eren, Arrate Egaña idazlea hurbilduko baita irakurleekin batera bere Itzalen distira liburua lantzera.
Izena eman. Antolatzaileek gogorarazi dutenez irakurtzeko zaletasuna duen edonori zabalik dago egitasmoa. Parte hartu nahi dutenek aurretiaz izena eman behar dute eta bi bide daude horretarako: udal euskara zerbitzura deituta 94 683 36 68 edo mrey@ondarroa.eus posta elektronikora idatzita. Horrez gain, Txomin Agirre udal liburutegira deitu 94 683 33 43 edo liburutegia@ondarroa.eus posta elektronikora idazteko aukera ere badago.
