Zapatuan ospatuko dute Mutrikuko Gaztetxe Eguna
Mutrikuko Gazte Asanbladak aisialdi eskaintzari ekarpen bat egiteko egun osoko egitaraua antolatu du zapaturako [maiatzak 4].
Herriko gazteen elkargune izan den, eta izaten jarraitzen duen, Mutrikuko Gaztetxeak bertan sortzen den giroa herrira zabaltzeko asmoz Gaztetxe Eguna ospatuko du zapatuan [maiatzak 4]; egun osoko egitaraua antolatu dute. “Gaztetxea urte luzez herrian gazteon elkargunea izan denez, asanbladatik urte hasieratik Gaztetxe Eguna antolatzeko lanean ibili gara”.
Egitarau parte hartzaile bat proposatzeko helburua ipinita, herrian egingo dituzte ekimenak. “Gazteok daukagun aisialdi eskaintza murritzen aurrean garrantzitsua iruditzen zaigu horri aurre egitea eta Gaztetxe Egunak ere espero dugu horri ekarpen bat egitea”. 12:00etan egunari hasiera emango diote txupina jaurtita, eta ostean, poteo olinpiadak egingo dituzte herriko gune ezberdinetan, trikiti eta pandero doinuez girotuta. Ostean, sari banaketa egingo dute eta talde argazkia aterako dute.
Eguerdian, mahai inguruan biltzeko unea ailegatuko da eta 40 lagun inguru batuko direla aurreikusten dute. Ostean (H)ondora kontzertu akustikoarekin gozatzeko aukera edukiko dute eta, atsedenaldiaren ostean, kalera aterako dira. “Txaranga a la mutrikuarra hasiko da 18:30ean”. Ostean, eguna borobiltzeko karaokea egongo da eta DJ Amataki eta lagunak izango dira gaua girotzearen ardura izango dutenak.
Gazte Asanbladatik ekimenetan parte hartzeko deia luzatu dute: “Mutrikuko gazteria egun honetan parte hartzera animatu nahi dugu, eta baita urte guztian aurrera eramaten dugun jardunera batzea”.
EGITARAUA
- 12:00. Txupina eta poteo olinpiadak, trikiti eta panderoarekin.
- 14:30. Sari banaketa eta argazkia.
- Ostean. Bazkaria.
- Bazkalostean. (H)ondora kontzertu akustikoa.
- 18:30. Txaranga a la mutrikuarra.
- 21:00. Karaokea.
- 00:00. DJ Amataki eta lagunak.
