Mutrikuk hirugarren postua lortu du 680 kiloko txapelketan
Atzo [maiatzak 12] Berriatuan erabaki zen Euskal Herriko 680 kiloko Sokatira Txapelketa. Mutriku Sokatira Taldeak txapelketaren balorazio positiboa egin du: "Sentsazio oso onak izan ditugu".
Argazkia: Xabi Eizagirre Euskal Herriko lur gaineko 680 kiloko Sokatira Txapelketaren hirugarren jardunaldia eta final handia jokatu ziren atzo [maiatzak 12] Berriatuan, San Gregorio jaien baitako giroan. Lea-Artibai eta Mutrikun lehiatu dira txapelketako jardunaldi guztiak eta ikuskizun ederrarekin gozatu dute eskualdeko herritarrek. Hala, Mutriku Sokatira Taldeari babesa eskaini eta hiru jardunalditan egindako lanaren ostean, brontzezko garaikurra lortu du taldeak.
Altxuneko zelaian batu ziren taldeak. Aurreko jardunaldietan Gaztedi A eta Goiherri taldeen arteko norgehiagoka bizitzeko aukera egon da eta hirugarren eta azken jardunaldiak, bien arteko lehia argitu du; Gaztedi A taldea nagusitu baita eta txapelketa bereganatu du 20,5 punturekin. Goiherri taldea, bigarren sailkatua izan da bi puntuko tartearekin (18,5 puntu). Mutrikuko gizonezkoen taldeak, ostera, hirugarren postuari eutsi dio eta garaikurra etxeratu dute, 14,5 puntu lortuta. Akelarre izan da laugarrena 12 punturekin, eta Mutrikuko bi talde nahasiak sailkatu dira ostean; San Geronimo (6 puntu) Saturraran (3 puntu).
Argazkia: Xabi Eizagirre
Lehenengo txapelketa izan da Mutriku Sokatira Taldeko emakumeentzat, baita gizonezko batzuentzat ere eta Marije Ituarte entrenatzaileak txapelketaren balorazio positiboa egin du: “Sentsazio oso onak eduki ditugu guztiok. Lehenengo txapelketa izanik helburua denek probatzea zen eta beldurrak kentzea, hortaz, helburuak bete ditugu. Zailena hastea izaten da eta gu hasi gara, hortaz, pozik gaude. Gainera, lur aldetik ere denetarik izan dugu eta horrela denetarik probatu dute, euripean aritu gara lur irristakorrarekin baita eguraldi onarekin ere.. probatzeko aukera eman digu. Orokorrean, oso sentsazio onak izan ditugu”.
Lehenengo txapelketa jokatuta bigarrenari heltzeko prest dago taldea, zapatuan [maiatzak 18] Deban hasiko da Euskal Herriko 640 kiloko Sokatira Txapelketa eta hiru jardunaldi edukiko ditu txapelketak.
