San Isidro jaia ospatuko dute mendexarrek
Domekan [maiatzak 19] gastronomia eta erronkak uztartuko dituzte mendexarrek.
San Isidro ospatzeko asmoz, jai giroan elkartuko dira mendexarrak domekan [maiatzak 19]. Gastronomia eta erronkak uztartuko dituen egitarau xume bezain erakargarria osatu dute, eguerdi inguruan ospatuko den jairako.
12:00etan hasiko dira eguna girotzen, eta ez da edozelako erronka izango burutuko dutena; furgoneta zahar bat erdibitzea izango da aizkolariek osatu beharko duten erronka. Horrez gain, Aroa Sanchez harri jasotzaileak erakustaldia eskainiko die herritarrei. “Alex Txikon ere etorriko da eta erronketan parte hartuko du”.
Ikuskizunekin gozatzen ari diren bitartean, mendexarrek jan edana edukiko dute, hain zuzen ere, bildotsa burduntzian egingo baitute. “12:00etatik aurrera pintxoak egongo dira”.
