Urrezko banakako aizkolari txapelketako finalaurrekoak jokatuko dituzte Etxebarrian
Domekan [maiatzak 19] finalaurrekoez gain, banakako aizkolari gazteen txapelketa, binakako aizkolarien txapelketa eta harrijasotze txapelketa ere egongo dira.
Iaz Julen Alberdi 'Txikia IV'.ak Urrezko Aizkolari Txapeldunen Liga irabazi zuen. Domekan [maiatzak 19] punta-puntako aizkolari eta harrijasotzaileek hartuko dute Etxebarriako pilotalekua. Urrezko banakako aizkolari txapelketako bi finalaurreko lehiatuko dira bertan, eta finalera sailkatuko direnak erabakita geratuko dira. 12:00etatik aurrera ikuskizunagaz gozatzeko aukera egongo da, doan.
Lehenengo finalaurrekoan Mikel Larrañaga, Ugaitz Mugertza mutrikuarra eta Jokin Urretabizkaia Basozabal ariko dira norgehiagoka. Bigarren finalaurrekoan, berriz, Julen Alberdi Txikia IV, Arkaitz Etxebeste eta Hodei Ezpeletak lehiatuko dute. Urrezko banakako lehiaketaz gain, aizkolari gazteen txapelketa ere egingo dute. 18 urtez azpikoen bi saio egongo dira: Oier Mitxelenak aurrez aurre edukiko du Amets Aristizabal, eta Unai Etxebarria Osinaldek, berriz, Kimetz Oñederra Aittola. Era berean, 16 urtez azpikoen beste bi saio ere egongo dira: Beñat Senosiain ariko da Kimetz Alzolaren aurka, eta Aitor Saralegi, ostera, Jaker Iruretagoiena Izeta V.aren aurka.
Gizonezkoek ez ezik, emakumezkoek ere edukiko dute euren tokia pilotalekuan, izan ere, binakako aizkolarien txapelketa jokatuko dute. Irati Astondoak eta Maika Ariztegik osatutako bikoeta zein baino zein gehiago ariko da Oihana Fernandez de Barrenaren eta Ane Zapirainen kontra. Eurekin batera, beste lau aizkolari ere ariko dira: Nerea Arrutik eta Malen Barrenetxeak aurre egin beharko diete Uxue Ansorregi eta Nerea Sorondori.
Azkenik, harri jasotzaileen txanda izango da. Juan Iguaranen omenezko txapelketa ikusteko aukera egongo da bertan, eta Aimar Galarraga eta Jokin Eizmendi ariko dira norgehiagoka estuan.
Antolatzaileek azaldu dute “maila oso oneko” kirolariak ariko direla Etxebarriko pilotalekuan, eta bertaratuz gero ikuskizun eder batekin gozatzeko aukera edukiko dutela. Hala ere, Etxebarrira joateko aukerarik ez dutenek ETBren bitartez jarraitu ahal izango dute txapelketa, 12:00etatik aurrera, ETB 1-en.
