Giro paregabea eta ikuskizuna bermatuta
San Isidro ospatu zuten atzo [maiatzak 19] mendexarrek eta erantzun ederra izan zuen jaiak. Eguraldia lagun edukita jende asko hurbildu zen herrira.
Argazkia: Mendexako Udala Giro paregabean ospatu zuten mendexarrek San Isidro ospakizuna. Atzo [maiatzak 19] eguerdian gastronomia eta erronkak uztartzeko hitzordua ipini zuten eta erantzun “oso ona” eduki zuen; herritarrak zein inguruko herrietako bizilagun asko eta asko izan ziren Mendexara hurbildu zirenak.
Eguraldia lagun, eguerdian batu ziren plazan. Dozena bat bildots erre zituzten eta baita saldu ere, “hegan egin zuten”. Arrakasta handia izan zuen burduntzian egindakoak eta baita ikuskizunek ere. Herri kirol ikuskizun osatua eskaini zuen laukoteak, eta ostean, furgoneta erdibitzeko erronkari heldu zioten; baita lortu ere. “Ikuskizun zoragarria izan zen eta herri kirol erakustaldia osatua zen. Eguraldia lagun izan genuen eta pila bat jende etorri zen. Egun borobila izan zen, hortaz, datorren urtean gehiago”.
