Harremanak sortzeko aukera "paregabea" izan da Musikaiaren eta Aralarren kontzertua
Nafarroako Aralar Udal Musika Eskolako musikariak joan ziren zapatuan [maiatzak 18] Lekeitiora, Musikaia Musika Eskolakoekin batera kontzertua eskaintzeko; "oso ondo" joan zen eguna.
Argazkia: Musikaia Musika Eskola. Musikak elkartu zituen iaz Nafarroako Aralar Udal Musika Eskolako eta Lekeitioko Musikaia Musika Eskolako musikariak, eta halaxe izan da aurtengoan ere. Zapatuan [maiatzak 18] elkartrukea egin zuten bi herrietako biztanleek, eta iaz lekeitiarrak Nafarroara joan ziren bezala, aurten nafarrak etorri dira Lekeitiora.
12:00etan Ikusgarri Zinema Aretoan elkartu ziren bi eskoletako musikariak, eta “oso ondo” joan zen eguna. Zinema aretoa erdiraino bete zen: “Kontzertua bertan eman genuen, eta guraso nafarrak ere etorri ziren. Ikasleek elkarrekin egun polit bat pasatu zuten”. Kontzertuaren ostean elkarrekin bazkaldu zuten, eta arratsaldea ere ezin hobeto pasa zuten: “Mendexa Abentura Parkera joan ginen elkarrekin. Egun osatua izan zen; harremanak sortzeko aukera paregabea izan zen”.
Argazkia: Musikaia Musika Eskola.
