Parte hartze "zabal eta anitzagaz", musika banda herrikoia sortu dute Lekeition
Parkeko Guneko kideek San Antolin jaietara begira parkeko banda herrikoia sortu dute. Balorazio "oso positiboa" egin dute antolatzaileek. Laguntza bonoak salgai daude oraindik ere, Eskolapeko botikan.
Argazkia: Parkeko Gunea. Lekeitioko Parkeko Guneko kideak goiz hasi dira aurtengoan San Antolin jaietara begira ekimenak antolatzen. Hain zuzen ere, zapatuan [maiatzak 18] elkartu ziren jaietarako musika banda herrikoia sortzeko asmoz. Parte hartze “zabala eta anitza” izan zuen ekimenak: “Oso ondo irten zen, oso balorazio positiboa egiten dugu Parkeko Guneko taldekideok”.
Arratsaldean hasi ziren ekintzekin, eta “eguraldi petrala” egin arren, “pozik” daude antolatzaileak. Serigrafia tailerragaz, “primeran” hasi zuten arratsaldea: bakoitzak bere kamiseta edo jertsea eroan zuen, eta musika bandarako uniformeak egin zituzten. Aldi berean, eraikuntza tailerra ere egon zen parte hartu nahi zuenarentzat; eguraldiaren eraginez elizapean egin behar izan zuten tailerra. Serigrafiagaz amaituta, musika instrumentuak egin zituzten: “Turutak, marakak, tanborrak… Bakoitzak berak nahi zuen eran egin zituen instrumentuak”. Arratsaldean egon zen ateruneetako bat erabili zuten herrian zehar kalejira egiteko.
Argazkia: Parkeko Gunea.
Era berean, informazio gunea ere ipini zuten, herritarrei gonbidapena egiteko Parkeko Gunean parte hartzeko: “Txosnetan laguntzeko, muntaian edo desmuntaian laguntzeko, egitaraua antolatzeko eta baita ekonomikoki aportazioa egiteko ere aukera egon zen”. Izan ere, laguntza bonoak egon ziren salgai: “Laguntza bonoak eskuragarri daude oraindik ere eskolapeko botikan. Udan eta jaietan ere salgai jarriko ditugu”. Hala, herritarrei eskerrak eman dizkiete antolatzaileek: “Oso polita eta oso dotorea izan zen zapatukoa. Ikusten da herri bat badagoela kultura eta jai egarriz, eta gu Parkeko Gunetik, ahal dugun neurrian, erantzuna ematen saiatuko gara”.
