Aizkolari onak eta giro aparta
Gizonezkoetan, Larrañaga eta Ezpeleta sailkatu dira finalera. Emakumezketan, Ansorregi-Sorondo eta Arruti-Barrenetxea.
Argazkia: Etxebarriko Udala. Aizkora giroan erreferentziazko txapelketan bihurtu da Urrezko Aizkora. Euskal Herriko aizkolari onenak aurrez aurre ikusteko aukera eskaintzen duen txapelketa da, eta domekan etxebarritarrek izan zuten puntako kirolariez gozatzeko aukera.
Gizonezkoen banakako txapelketan, bi txanda ospatu ziren. Lehenengoan, Mikel Larrañagak, Ugaitz Mugertzak eta ‘Basozabal’ek lehiatu zuten. Larrañaga nagusitu zen maisutazunez, eta finelarako txartela lortu zuen. Bigarrenean, Hodei Ezpeleta, Suharri Rodriguez eta Arkaitz Etxebeste izan ziren, eta Ezpeletak lortu zuen finalerako sailkapena.
Gizonezkoek banaka lehiatzen badute ere, emakumezkoek bikoteka parte hartzen dute Urrezko Aizkoran. Lau izan ziren
Etxebarrin plazaratu zuten bikoteak: Uxue Ansorregi eta Nerea Sorondo, Nerea Arruti eta Malen Barrenetxea, Oihana Fernandez de Barrena eta Ane Zapirain, eta Irati Astondoa eta Maika Ariztegi. Aipatutako lehenengo bi bikoteek lortu zuten denborarik onena, eta beraz, horiek izango dira finalean. Nagusien txapelketez gain, bertaratutakoek 16 eta 18 urte azpikoen gizonezkoen banakako aizkora txapelketa ikusteko aukera izan zuten. Baita Juan Iguaranen omenezko harri jasotze erakustaldi bat ere .
