Emakumezkoen esku pilota, erdigunera
Domekan [maiatzak 26] binakako bi partida jokatuko dituzte eskualdeko nahiz inguruetako emakumezko pilotariek. Ziortza-Bolibarko Udalak euren aldeko apustua egin nahi izan du, ikuspegi feminista egunerokotasunean txertatzeko asmoz.
Ziortza-Bolibarko Udalaren ekimenez, emakumezkoen esku pilota partidak ikusteko aukera egongo da domekan [maiatzak 26] Ziortza-Bolibarko frontoian. Udalak azaldu duenez, euren eguneroko jardunean ikuspegi feminista txertatzeko ahalegina egiten ari da, eta hari horri tiraka antolatu dituzte partidak: “Emakumeak ahalduntzeari ekarpen bat egin nahi izan diogu”.
Guztira binakako bi partida jokatuko dituzte, eskualdeko nahiz inguruetako pilotariek. 13:00etan hasiko da lehenengo partida: Uxue Gaston lemoarrak eta Laiene Sandia gernika-lumotarrak bikotea osatuko dute, eta Bintou markina-xemeindarraren eta Jone Egia durangarren aurka ariko dira. Jarraian, Lemoako pilotariek hartuko dute kantxa: Saioa Gonzalez eta Izaro S. Zabalak aurrez aurre izango dituzte Amaiur Beroiz eta Malen Gonzalez.
Udalak adierazi du garrantzitsua dela herrian kirol jarduerak edukitzeaz gain, “neskek historikoki ukatua izan duten lekua eta protagonismoa berreskuratzea”. Era berean, herriko nerabe eta gazteek emakumezko kirolariak ere erreferentetzat edukitzea beharrezkoa dela uste dute, “bai neska bezala ahaldundu daitezen, eta baita neska-mutil gazteek normaltasunez barnera dezaten nesken parte hartzea kirol eremuan ere”. Hala, herriko nahiz inguruko herritar guztiei luzatu diete bertara joateko eta kirolari gazteen jardunarekin gozatzera joateko deia.
Berdintasun Plana. Egunerokotasunean ikuspen feminista txertatzeko ahalegina lantzeko, gizon eta emakumeen berdintasunaren diagnostikoa landu du udalak, eta hortik eratorri da Ziortza-Bolibarko Berdintasun Plana: “Herri justuago batera iristeko hausnarketa kolektibo bat izan da, eta hainbat ardatz lehenetsi ditugu”. Hala, ardatzak honakoak dira: “Gobernu ona herriko emakumeen ahalduntzea, gure ekonomia eta gizartearen eraldaketa eskubideak bermatzeko, eta emakumeen kontrako indarkeriarik gabeko bizitza”. Hain zuzen ere, ardatz horien inguruan egindako lan gehigarria da antolatu dituzten emakumezkoen pilota partidak.
