Eskualdeko hainbat udalek bat egin dute Osasun Sailburuagaz batzartzeko asmoz
Lekeitioko, Mendexako, Amorotoko, Gizaburuagako, Aulestiko eta Eako Udalek eskaera bateratuak landu dituzte, eta batzarra eskatuko dute Osasun Sailburuarekin. Helburua, Lekeitioko anbulatorioko zerbitzua, gutxienez, pandemia aurreko egoerara itzultzea izango da.
Argazkia: Lekeitioko Udala. Lekeitioko Udalak deitutako bilera batean elkartu ziren atzo [maiatzak 20] Mendexako, Amorotoko, Gizaburuagako eta Eako Udalak, osasun zerbitzuko egoera aztertu eta eman beharreko hurrengo urratsak erabakitzeko; Aulestiko Udalak bileran parte hartzeko aukerarik izan ez duen arren, ibilbidea batera egiteko nahia azaldu duela adierazi dute. Lekeitioko anbulatorioko osasun zerbitzua, gutxienez, pandemia aurreko egoerara itzultzeko helburuagaz, elkarlanean lan egiteko konpromisoa hartu dute. Hala, Osakidetzari eskaera partekatuak eskatu nahi dizkiete, zenbait puntutan bat egiten dutelako.
Bileran bi puntu nagusi landu zituzten: “Bata, Lekeitioko osasun zerbitzuari buruzko eskaera zehatzak adostea, eta bigarrena, udalok elkarrekin ze pausu eman ditzakegun erabakitzea”. Hala, lehenengo pausuari dagokionez, egingo dituzten eskaerak zeintzuk diren erabaki zituzten, Lekeitioko anbulatorioko osasun zerbitzua pandemia aurreko egoerara itzultzeko helburuagaz.
Guztira zazpi eskaera zehatz egin dituzte. Alde batetik, hainbat zerbitzu itzultzeko eta mantentzeko eskaera egin dute: pediatria zerbitzua bermatzea, ginekologia zerbitzua 2014an adostutako baldintzetan itzultzea eta emagina jubilatzen denean bere lanpostua jardun osoarekin betetzea.
Lekeitioko Udalak adierazi du lanean jarraituko dutela “eskaerak lortu arte”.
Bestalde, langileen ordezkapenak betetzea eta udan herrian dagoen populazioari erantzun ahal izateko mediku eta erizain gehiago ipintzea ere eskatu dituzte. Azkenik, EAG eta anbulantzia medikalizatua Lekeition beti bermatuta izatea eskatu dituzte, eta baita herri txikietako osasun zerbitzuak dauden bezala mantentzea ere.
Udalek elkarrekin eman beharreko pausuei dagokionez, berriz, erabaki bat hartu dute: “Erabaki duguna da gure eskaerekin arduradun gorenarenganaino heltzea, alegia, Osasun arloko Sailburuarengana. Hala ere, ibilbide honen berri, lehenengo eta behin, inguruko herriekin partekatzen ahaleginduko gara, gure eskaerek, zenbait puntutan, bat egiten dutelako eurekin. Adibidez, Busturialdeko edo Lea-Artibaiko gainontzeko herriekin”.
Eskaerak eta erabakiak hartuta, hurrengo pausua elkarlanean lanean jarraitzea izango da. Lekeitioko Udalak adierazi du helburua “herritarren bizitzak hobetzea” dela, eta horretarako zerbitzu publiko duin eta kalitatezkoak izatea ezinbestekoa dela: “Udaletik lanean segituko dugu eskaerak lortu arte”.
