Goi mailako finalak eman ditu Berriatuko San Gregorio Txapelketak
Domekan [maiatzak 19] jokatu zituzten maila desberdinetako azken partidak.
Orain bai, amaitu dira Berriatuko San Gregorio jaiak. Zelan ez, azken urteetan bezala, zesta-puntako txapelketako finalekin amaitutzat eman dituzte jaiak. Txapelketa hilabete asko lehenago hasten badute ere, zesta eskolakoek domekarako [maiatzak 19] jarri zuten hitzordua 36. txapelketarako eta XV. Felix Aldazabal memorialerako.
Argazkia: Berriatuko zesta eskola
Bost final jokatu ziren eta antolatzaileek finaletan ikusitako “maila bikaina” nabarmendu dute. Era berean, berriatuarrek Mendibarren frontoia betetzeko egindako ahalegina azpimarratu eta esker nahi izan dute. Finaletan kolore urdina izan zen nagusi. Hain zuzen ere, urdinez jokatu zuten bikote guztiek jantzi zuten txapela.
Nagusietan Maxime Benetrixek Gorka Mugartegi Atainek lortu zuten garaipena finalean Eñaut Urreisti eta Roberto Lekueri. Nesketan, berriz, Elaia Gojenolak eta Frida Watkinsek ezustekoa eman zuten Erika Mugartegi eta Maia gaindituz. Gainontzeko mailetan Ametsek eta Cabanillasek Retolaza eta San Joseri irabazi zieten, Txominek eta Argoitiak Lekue III eta Kirmeni eta Jokin eta Enekok Orkatz eta Xubaneri.
