‘Herri libre bat’ dinamikaren baitan mural margoketa egingo dute Mendexan
Mendexako herritar guztiei luzatu die mural margoketan eta argazki erakusketan parte hartzeko gonbita Gure Eskuk. Domekan [ekainak 23] izango da hitzordua, 12:00etan.
Herri Libre Bat bi urteko herri dinamika aurkeztu berri du Gure Eskuk eta honen baitan, herrietan ekimen desberdinak antolatuko dituzte. Domeka [ekainak 23] honetan Herri Libre Bat lemapean mural margoketa egingo dute mendexarrek, Mendexako Frontoiko horman, eguerdiko 12:00etan. Horrez gain, orain arteko ekintzen argazki erakusketa bat jarriko dute herriko plazan eta materiala erosteko aukera ere egongo da.
“Herritar guztiak daude gonbidatuta. Helburua, Euskal Herriarenganako pertenentzia sentimendua piztu eta datozen urteetara begira herritarrak aktibatzea da”, aipatu dute antolatzaileek. Momentu garrantzitsua dela diote, ilusioagaz eta indarrak batuta Euskal Herria “Herri Librea” izango dela aldarrikatzeko unea, hain zuzen.
“Erabakiaren bidea elkarrekin egitea” du helburu dinamika berriak eta gaur [ekainak 19], 19:00etan, emango diote hasiera aurkezpen birari Lekeitioko Azkue Aretoan. Ondarroan amaituko dituzte aurkezpenak uztailaren 6an.
