Egun guztiko egitarau biribilagaz datoz Murlako jaiak
Bihar [abuztuak 29] ospatuko dituzte Aulestiko Ibarrola auzoan Murlako jaiak.
Murlako jaiak ospatuko dituzte bihar [abuztuak 29] Aulestiko Ibarrola auzoan, egun osoko egitarauagaz. Duela bi urte aldatu zuten egitarauaren formatua eta oraingoan ere horrela egingo dute: “Aurreko urteetan mus txapelketaren ondoren atsedena egiten genuen eta honek gaueko egitaraua baldintzatzen zuen, jendea eramatea gehiago kostatzen baitzen horrela. Duela bi urte aldatu genuen formatua eta egitarau guztia jarraian jarri genuen. Oraingoan ere horrela egngo dugu”.
Urtero legez, mezarekin emango diote hasiera egunari, eta ondoren, duathloia egongo da. “Apuntatzeko egunean bertan eman beharko da izena, 12:00etatik 13:00etara bitartean”, aipatu dute antolatzaileek. Lehenengo buelta korrika egingo dute parte hartzaileek eta hurrengo biak bizikletan. Ondoren, txinga jaurtitzea egongo da. Txapelketa batean zein bestean irabazleak 60 euro eta garaikurra eskuratuko ditu, bigarrenak 50 euro, hirugarrenak 40 euro, laugarrenak 30 euro eta bosgarrenak 20 euro.
17:00etan ekingo diote arratsaldeko egitarauari, mus txapelketagaz. Urte asko daramatzate mus txapelketa antolatzen eta nolabaiteko “prestigioa” duela aipatu dute antolatzaileek: “50 urte inguru igaroko ziren lehen aldiz mus txapelketa antolatu zenetik eta honek, garrantzia berezia ematen dio eskualdean. Iaz, gutxi gorabehera, 48 bikotek hartu zuten parte”. Irabazleek 240 euroko eta txapel bana eskuratuko dituzte, bigarrenek 180 euro eta garaikur bana, hirugarrenek 120 euro eta laugarrenek 60 euro.
Mus txapelketaren ondoren gaztetxoenen txanda izango da, 18:00etan hasiko dira umeentzako jolasak: “Ume asko batzen dira ekintza honetan, geroz eta gehiago, eta giro oso polita sortzen da”.
Antolatzaileek Murlako jaietara animatzen dituzte herritar zein inguruko guztiak: “Polita izaten da biharko eguna, denak animatzen ditugu egitarauagaz gozatu eta antolatutako ekintzetan parte hartzera”.
- 12:00. Meza.
- Ondoren. Duathloia..
- Ostean. Txinga jaurtitzea.
- 17:00. Mus txapelketa.
- 18:00. Umeen jolasak.
- 20:30. Pintxo potea.
- 20:00. Joxe Mendizabal musikaria.
