Domekan ospatuko da Euskadiko Itsas motorren Txapelketa, Mutrikun
I. Endurance Mutriku eta Euskadiko Itsas Motorren Txapelketa egongo da etzi [irailak 8] Mutrikuko portuan.
Uretako motorren pista bihurtuko da Mutrikuko portua etzi [irailak 8], izan ere, I. Endurence Mutriku eta Euskadiko Itsas Motorren txapelketa ospatuko da bertan, Euskadiko Itsas Motorren Federazioak antolatuta, Mutrikuko Udalarekin elkarlanean. 15 urte baino gehiagotan itsas motorretako pilotuen entrenamenduak burutu dira bertan eta domekan 2024ko Euskadiko Itsas Motorren Txapelketako garailea nor izango den erabakiko da. Horrez gain, pilotu berriak txapelketa munduan hasteko “aukera aproposa” dela adierazi dute antolatzaileek.
Zazpi kilometroko zirkuitu “itxian, mugatuan eta ziurtatuan” egingo da txapelketa, Mutrikuko portua eta Saturraran bitartean, eta bi txanda jokatuko dira. Zirkuitua mugatzeko orduan, egunean bertan, antolatzaileek bost boia jarriko dituzte. Lehenengo txanda 10:30ean aterako da eta bigarrena 12:30ean. Ondoren, 14:30ean sariak banatuko dira Txirlatxo ondoko oholtzan.
Parte hartzaile guztiek izan beharko dute urtetako motorra gidatzeko titulazioa, federazio-lizentzia eta estropadetarako motorraren asegurua. parte hartzaileek estropadetarako motorraren asegururik ez izatekotan, 24 orduko asegurua kontratatzeko aukera dago, 60 euroren truke euemf@euskalkirola helbidean eskatuta. Horrez gain, lehiatzeko gutxieneko adina 8 urtekoa da eta 18 urtetik beherakoek gurasoen baimen idatzia aurkeztu beharko diote federazioari.
