Gustura ibili dira lekeitiarrak umeen mastapuntakoan
Umeen Eguna ospatzen ari dira gaur Lekeition, eta eguerdian mastapuntakoan ibili dira hainbat ume. Imanol Lekerikabeaskoa, Unai Mijangod eta Lander Zatika izan dira irabazleak.
Antzar Egun handiaren ostean heldu ohi da lekeitiar txikienek gustukoen duten eguna, Umeen Eguna, hain zuzen ere. Aste guztian zerua ilun egon den arren, gaurkoan [irailak 6] eguzkia bete-betean ikusi ahal izan dute Abadeen Moilara umeen mastapuntakoa ikustera joan direnek. Aurten 22 ume eta gaztetxo ausartu dira mastapuntakoan parte hartzera: 2013 eta 2014 urteetako hamabi, 2011 eta 2012 urteetako bi eta 2009 eta 2010 urteetako zortzi.
Hala, eguerdia jotzeagaz batera hasi dira umeak jolasean. Txikienek eman diete hasiera saioari, eta erraza izan ez den arren, lan guztiak ondo eginda Imanol Lekerikabeaskoak lortu du ikurrina. Jarraian, galtzeko denborarik barik, 2011 eta 2012 urteetako umeek ekin diete mastapuntakoa zeharkatzeari, eta batzuk gertu ibili arren, Unai Mijangod Larrabek lortu du bigarren ikurrina.
2009 eta 2010 urteetako gaztetxoetako batzuek ere, gertu eduki dute ikurrina. Koipea kendu, hondarra bota… aurrera eta atzera ibili dira nagusienak, eta azkenean, ikurrina zulotik ateratzea kosta zaion arren, Lander Zatika Elordik lortu du azken ikurrina.
Lander Zatika, ikurrinagaz.
Mastapuntakoan ibili nahi ez zutenek, aldiz, hainbat aukera eduki dituzte. Barraketan, nola ez, ilara luzeak sortu dira, baina dirurik gastatu barik ere aukera eduki dute umeek gozatzeko, plazan ipini duten umeen parkean.
Goizeko jardunaren ostean ere badago zer egina herrian. 18:30ean Jokai euskal mitologian inpiratutako jolas sortzaileen konpainiaren jolasak egongo dira Plaza Merkatuan, eta ostean, Azken eguzki lorea ikuskizuna egongo da, toki berean. Parkeko Gunean eta portuko txosnetan ere ez da aspertzeko astirik egongo.
