Herritarrak Lea Ibilbideko Martxan elkartuko dira
Domekan [urriak 6], ibilbide luzea eta laburra edukiko dituzte XII. Lea Ibilbideko Martxako parte hartzaileek. Munitibarko helmugan, kopaua eta jai giroa nagusituko dira.
Lea Ibibideko Martxa bere XII. ekitaldira iritsi da. Datorren domekan [urriak 6] egingo dute Lea Ibarreko Udal Mankomunazgoak antolatuta eta ibar horretako udalen laguntzagaz. Luzera desberdineko ibilbide bi prestatu dituzte, betiere herritarren mailari eta profilei begira. Edozelan ere, biak ala biak egiten errazak eta zailtasun teknikorik gabekoak izango dira. Ibilbide luzeak Mendexako Marierrota eta Munitibar lotuko ditu; tartean, martxalariak Amoroto, Gizaburuaga eta Aulestiko lurretatik pasako dira, 23 kilometroko bidea osatzeko. Aukera luzea hautatzen dutenak 08:15ean hasiko dira oinez. Ibilbide laburrekoek, aldiz, Aulesti eta Munitibar arteko tartea egingo dute oinez, 7 kilometro ingurukoa, eta 10:30ean ekingo diote, Errekondo parkean hasiz.
Martxa luzekoek zenbait hornidura gune topatuko dituzte ibilbidean zehar. Batetik, Gizaburuagako Errotazar lasaigunean indarrak berritu ahalko dituzte; bigarren geralekua Aulestiko parkean edukiko dute. Edozelan ere, antolatzaileek azaldu dute ibilbidean “hainbat iturri” daudela eta, hori horrela, parte hartzaileei etxetik “botila edo kantinplora” eroateko deialdia luzatu diete.
Ibilbidean amaituta, jaiak oraindik jarraitu egingo du. Izan ere, 12:00etatik aurrera, Bengolako parkean kopaua eta jan-edana edukiko dituzte parte hartzaileek. Ez hori bakarrik: 13:00etan, toki berean, zozketa egingo dute. Zehazki, 100 euroko jatordua zozkatuko dute, Lea Ibarrean kokaturiko udalerri bateko jatetxean. Jai giroan eta aldarte ederrean emango diote amaiera Le Ibarreko herritarrentzako egun berezienetako bati.
