Lekeitio Lagunkoia taldeak "ahots eta esku berriak" behar ditu
Herritarrei Lagunkoia taldean parte-hartzeko deia luzatu diete. Hurrengo bilera urriaren 15ean izango da.
Lekeitio Lagunkoia taldeak 2017an eman zituen bere lehenengo urratsak. Ordutik egin duten ibilbidea luzea izan da, baina, beti, helburu argi batekin: belaunaldi guztientzako udalerri lagunkoiagoa eta irisgarriagoa eraikitzea. Hala, talde eragileari esker, udalerri nabarmen hobetu duten hainbat ekimen eroan dituzte aurrera. Orain, baina, aurrera egiteko “une garrantzitsuan” daude: “Ahots eta esku berriak behar ditugu ibilbide hori indartzen jarraitzeko”.
Hori horrela, herritarrak erakartzeko helburuarekin, Lekeitio Lagunkoia taldeak triptiko berri bat eta aurkezpen bideo bat kaleratu ditu. Orain arte egindako ibilbidearen berri eman nahi izan diete herritarrei: “Hainbat ekintza egin ditugu, esaterako, Argaizto Parkearen berritzea bezalako ekimenetatik hasi eta ingurumenaren eta ongizatearen inguruko sentsibilizazio kanpainetaraino. Gainera, aipatzekoa da 2023an Lagunkoitasuneko Jardunbide Egokien Saria jaso genuela, lanaren eragin positiboa islatzen duen aitorpen gisa”.
2024a amaitu aurretik helburu nagusi bat betetzeko nahia dute Lagunkoiako kideek: herritarren parte-hartzea sustatzea, bereziki pertsona nagusien bizi kalitatea hobetzeko ekimenetan. Hala, herriko bizilagun guztiei luzatu diete Lagunkoi taldearen parte izateko gonbidapena: “Ziur gaude jendearen inplikazioa giltzarri izango dela Lekeitio lagunkoiago bat lortzeko”.
Azaldu dutenaren arabera, bilerak hilero egiten dituzte, eta ordu bateko iraupena izaten dute. Nola ez, parte hartu nahi dutenentzako bilera irekiak dira. Bilerak 10:00etatik 11:00etara egiten dituzte, eta hurrengoa, urriaren 15an izango da. Azaroko bilera aldiz, 19an izango da, eta abendukoa, 17an. Izena emateko agurtzane-ongintza@lekeitio.eus helbide elektronikora idazteko eskatu dute.
