Uztailean Mutrikun sua hartu zuen eraikina amildu da gaur goizaldean
06:00 inguruan jazo da gertakaria, eta ez da zauriturik egon. Eraikina amildu denean aldamioak eraitsi ditu.
Eraikina amildu ondorengo argazkia. Argazkia: WhatsApp. Uztailaren 21ean Mutrikuko Barrenkale kalean sua hartu zuen eraikinaren zati bat amildu da gaur [eguaztena] 06:00ak inguruan, eta beheko aldamioak aurretik eraman ditu. Suhiltzaileak, Ertzaintza eta udaleko teknikariak hurbildu dira bertara, eta ez da zauriturik egon.
Erre zenetik gaur arte eraikina eraisteko aurrelanetan ibili direla adierazi du Mutrikuko Udalak: “Udalak sustatuta, Gipuzkoako Foru Aldundiko eta Eusko Jaurlaritzako teknikari gaituekin batera lanean ibili gara, eta Alde Zaharrean babestutako elementua den eraikina eraisteko aurrelanketa egin da. Eusko Jaurlaritzaren Ondare zuzendariak baimena eman ondoren, udalak burutuko ditu eraiste lanak. Horrez gain, babes mailaren ondoriozko azterketak luzatu direlako eta udala Jaurlaritzaren baimenaren zain egon delako ez ditu hasi lehenago eraispen lanak”.
Udal arkitekto aholkulariak egindako txostenean, hurrengo urratsak zehaztu dituzte: “Eraikinaren eraisketa eta ondoko eraikinen segurtasuna bermatzeko teknikari gaitua urgentziaz kontratatzea eta honekin batera, eraisketa lanak burutuko dituen enpresa kontratatzea. Baita, kalea erabat ixtea ibilgailu zein oinezkoentzat”. Hartutako erabakiak Gipuzkoako Foru Aldundiko Kultura Departamentuari, Eusko Jaurlaritzako Kultur Ondarearen zuzendaritzari eta eraikinaren jabeei jakinaraziko zaizkiela adierazi du Mutrikuko Udalak.
Sutea. Mutrikuko Malen jaietako lehenengo egunean piztu zen sua, Barrenkale kaleko 6. zenbakiko eraikinean, 08:00etan. Hirugarren solairuan hasi zen sua, eta bost pertsona zauritu zituen. Eraikina “oso kaltetuta” gelditu zen, eta gaur goizaldean, amildu egin da. Udalak jakinaraztera eman zuenez, kaltetuei ordezko bizilekua bilatu zien, “hala, egoera onera ekarri artean badute non bizi”.
Uztaileko sutearen eta gero, eraikinaren egoera.
