Zapatuan ospatuko dute IV. Aniztasunaren Besarkada Eguna
Ekai Lersundi gogoan izan, aniztasuna aldarrikatu eta elkarri babesa emateko helburuarekin dator aurten ere Aniztasunaren Besarkada Eguna. Zapatuan [urriak 12] egingo dute ekitaldia, 13:00etan, Itsasaurren.
Laugarrenez ospatuko dute zapatuan [urriak 12] Aniztasunaren Besarkada Eguna Ondarroan. Urriaren 13a Ekai Lersundi Martinezen urtebetetze eguna izanik, bera gogoan izan, aniztasuna aldarrikatu, eta besarkadak daukan garrantzia nabarmentzeko eguna izango da. Aurten, gainera, zapatuan egingo den urteroko ekitaldiaz gain, beste hainbat ekintza antolatu dituzte astean zehar eta asteburuan. Hasieran Ekai Lersundi Martinezen gurasoek antolatutako eguna bazen ere, Ondarroako Udalarekin, Hezkidetza Egitasmoarekin eta Berdintasun Kontseiluarekin elkarlanean egingo dute oraingoan.
“2018ko otsailaren 17an Naizen Elkarteak omenaldia egin zion Ekairi Ondarroako Musika Plazan. Bertatik, Ekairen monolitora bidean, Aingeru Mayorrek -Naizeneko lehendakari izandakoa eta gaur egun kidea- besarkada benetan berezia eman zidan, betea. Besarkada horrek transmititu zidana behar duenari transmititzeko nahia izan nuen. Eta zer hobeto besarkada eguna antolatzea baino? Horrez gain, Ekairi pertsonalki ezin diogunez opari gehiago egin, egun hau, bere urtebetetze egunaren bueltan izan behar zela pentsatu genuen”, adierazi du Elaxar Lersundik.
Atzo [urriak 9] eman zioten hasiera egitarauari, ZARATA audio erakusketarekin, eta bertaratuek “oso ondo” egon zela aipatu dute. Hodei Arrastoaren LGTBIQ+ kolektiboari buruzko audio gida da honakoa, eta kolektiboaren parte diren hainbat norbanakok parte hartu dute bertan: “ZARATAren parte garenok ez gara maisuak, ez dugu egia absoluturik azaldu nahi. LGBTI+ kolektiboaren parte garen norbanakoak gara soilik eta gure bizipenak eta istorioak duintasunez azaldu nahi dizkiegu euskal herritarrei, ezjakintasunak dakartzan tabuek sorrarazten dizkiguten egoera deserosoei aurre eginez. Galdera mordoa egin eta erantzun gutxi batzuk emango ditugu. Oraindik lan handia daukagu gizarte inklusibo bat izatera iristeko eta ZARATA proiektuak bide horretan aurrerapauso bat izan nahi du”.
Bihar [barikua], 11:00etan, hezkidetza egitasmoaren barnean, museo ibiltaria egongo da Itsasaurren, eta herriko ikastetxeek hartuko dute parte, hezkidetzako hezitzaileekin genealogia feministaren eta LGTBIQ+ kolektiboaren inguruan egindako lanketa plazaratuz.
Etzi [zapatua], Aniztasunaren Besarkada Egunean, Euskal Herriko batukada feministen sareak girotuko ditu Ondarroako kaleak, 12:00etan hasita. Ondoren, Itsasaurren batuko dira denak, 13:00etan, Ekai Lersundiren monolito aurrean, eta urteroko ekitaldia egingo dute; agurra, dantzak, Bibitxa ikuskizuna, eta nola ez, besarkada espirala. Euria egiten badu, Etxelilan egingo dute ekitaldia. Egunari jarraipena emateko, Alargun Beltzak taldearen kontzertua egongo da Alde Zaharrean, 19:00etan. Elaxar Lersundik besarkadak elkarbanatzera joateko deia egin die herritarrei: “Garrantzitsua da besarkadak ematea, nik, beso zabalik emango dizkiot behar duenari, eta ez zapatuan soilik, urteko beste egunetan ere bai”.
