Euskal baserriaren historia ezagutzeko lehen ibilbide gidatua egingo dute Ispasterren
Bizkaiko Ondarearen Europako Jardunaldien baitan egingo dute irteera.
Bizkaiko Foru Aldundiak koordinatutako Bizkaiko Ondarearen Europako Jardunaldien baitan, Euskal baserriaren historia ezagutzeko lehen ibilbide gidatua egingo dute Ispasterren, zapatuan [urriak 26], eta domekan [urriak 27], 10:00etan, plazatik aterata. Izena eman zuten partaide guztiengatik bi egunetara luzatu behar izan dute irteera.
Ispasterko Udalak antolatu du eta Anartz Ormaza kultur ondarean aditua den arkitektoaren eta Guillermo Ruiz de Erentxun bideetan adituaren eskutik egingo dute. Garbiñe Saenz de Buruaga Ispasterreko alkateak ere parte hartuko du. 10 kilometroko bidea da, eta zehaztu dute hamar geldialdi inguru egingo dituzte. Lau orduko ibilbidea izango dela azaldu dute.
Bertan, Ispaster “bakarra egiten duen” bere ondaren kuluralaren altxorrak ikusiko dituzte parte hartzen dutenek lehen aldiz. Hain zuzen ere, herriak euskal baserri zaharrenetako eta hobekien kontserbatutako batzuk gordetzen ditu, XV. eta XVI. mendekoak. “Ispaster landa arkitektura tradizionalaren museo bizia da, eta euskal baserriaren historia ezagutzeko aukera ematen du”, esan dute.
