Amorotoko gorabehera guztiak azaldu dituzte herritarrek Bizkaia Irratian
Herriz Herri saioan parte hartu dute hainbat herritarrek, tartean, Asier Arrizabalaga alkateak, Ibon Gabiola alkate ohiak, Ainhoa Ansorregi kultura zinegotziak, Iban Zabala kirolariak eta Amorotoko eskolako hainbat ikaslek.
Amorotoko herritarrek Bizkaia Irratiko esatarien bisita eduki zuten zapatuan [azaroak 9]. Herriz Herri irratsaioko Beñat Igarzagaz berbetan aritu ziren Asier Arrizabalaga gaur egungo alkatea, Ibon Gabiola alkate ohia, Ainhoa Ansorregi kultura zinegotzia, Iban Zabala eta Amorotoko eskolako hainbat kide: Intza, Maule, Anje, Ilargi, Udare eta Xanet.
Arrizabalagak eta Gabiolak hainbat gairen inguruan berba egin zuten. Elkarrizketagaz hasterako, hauteskundeek herrian zelan funtzionatzen zuten azaldu zuten. Ostean, herriko hainbat proiekturen inguruan aritu ziren, pilotalekuko eta osasun etxeko obren inguruan, besteak beste. Arrizabalagak adierazi zuenez, duela hamabi urte hasi zituzten frontoiko obrak, eta 2025ean beste fase batekin hasteko esperantza dute.
Euren ostean, Ainhoa Ansorregi Amorotoko kultura zinegotziak hartu zuen hitza, eta urteko kultur ekintzen nondik norakoak azaltzeagaz batera, herriko dantza taldearen inguruan ere aritu ziren: dantza taldeak herrian zenbat emanaldi eskaintzen dituen, eta zenbatek parte hartzen duten azaldu zuen.
Jarraian Zabala kirolariaren txanda izan zen; pilota eta pala munduari buruz aritu zen. Herrian kirol horrek duen garrantzia azaltzeaz gain, berak parte hartzen duen txapelketen inguruan ere aritu ziren.
Amaitzeko, herriko txikienen txanda izan zen: “Umeek herriko eskola txikiaren funtzionamendua azaldu zuten, eta eurek eskolan ze esperientzia duten kontatu zuten. Egunerokotasunaren azalpenak eman zituzten”.
