Lea ibaia Lekeitioko lurretan jaio eta itsasoratzen da
Lekeitioko Udalak Lea ibaia jaiotzen den lurra eskuratu du, ibaia eta bertoko basoak zaintzeko asmoz.
Lekeitioko Udalak joan den eguenean [azaroak 5] eskuratu zuen Lea ibaia jaiotzen den lurra. Udal ordezkariak “pozik” daude lorpenagaz: “Pozik esan genezake Lea ibaia Lekeitioko lurretan jaio eta itsasoratzen dela”. Hala, Lea ibaia babestea da udalaren helburua: “Edaten dugun ura Lea ibaitik dator. Baso hau erosita Lea ibaia babestu eta edaten dugun uraren kalitatea bermatuko dugu”.
Ur edangarriaren kalitatea bermatzea da udalaren helburua, bertoko basoak sustatzeko apustua egiteagaz batera: “Udaletik argi daukagu ibaiak zein bertoko basoak zaintzeko apustua egin beharra dagoela. Zuzenean gure ongizatean eragiteaz gain, klima aldaketari aurre egitea eta biodibertsitatea zaintzea guztioi dagokigu”. Ezinbestekotzat jo dute halako ibaiertzetako basoak zaindu eta babestea: “Kontuan hartu behar da gure eskualdean ur edangarria honelako errekastoetatik eskuratzen dugula, eta ibaian behera joanda ur hartuguneak ditugula”.
Lea ibaia, hain zuzen ere, Kontserbazio Bereziko Eremua da, eta Natura 2000 sarean sartuta dago. Marraixo errekan jaiotzen da, eta udal ordezkariek adierazi dute “berebiziko garrantzia” daukala haren zaintza eta kontserbazioa bermatzeko inguruko lurrei ematen zaien erabilerak: “Ibai basoa funtsezkoa da oreka ekologikorako, babesa ematen baitie urari eta lurrari; izan ere, ibaiko uren indarra eta sedimentazioa murrizteaz gain, uraren kalitatea mantendu eta kutsatzaileen sarrera ekiditen dute ibai basoek”.
Kontserbazio Bereziko Eremua den arren, oraintsura arte “basogintza intentsiboaren bidez” pinua erauzten zen bertatik; azken mozketa 2019an egin zen, zuhaiztia gaitzak jota zegoelako. Udalaren esanetan, basogintz mota horrek eragin zuzena dauka “lurren egonkortasunean, lurarren kalitatean zein ibaian bertan”. Hori horrela, ibaia babestu ahal izateko erabilera horiek “guztiz alboratzea” beharrezkoa dela uste dute: “Habitatari dagokion babesa eskaintzea funtsezkoa da. Udaletik argi daukagu krisi klimatikoari aurre egiteko eta biodibertsitatea zaintzeko, ibaiak eta bertoko basoak zaintzeko apustua egingo dugula”.
