Bir Ganduz proiektuari jarraipena emateko helburuagaz, Saharara bidaiatu dute 18 lagunek
18 lagunegaz osatutako taldea aste betez egon da saharar errefuxiatuen kanpamenduetan, bertan martxan zeuden proiektuei jarraipena emateko helburuagaz. Horrez gain, Ondarroako Udaleko ordezkariek ere bidaiatu dute Saharara, proiektuak ezagutzeaz gain, Saharako Emakumeen Batasun Nazionaleko Elkartearen 50. urteurreneko ekimenean parte hartu dute.
Argazkia: Yaalah Elkartea. Bir Ganduz proiektuari jarraipena ematea helburu izanik, saharar errefuxiatuen kanpamendura bidaiatu dute 18 lagunek, Ondarroatik. Yaalah Elkarteko kideez gain, harrera familiak, norbanako herritarrak, eta udal ordezkariak ere egon dira. “Bidaia anitza izan dela esan dezakegu, 18 laguneko taldea joan gara Saharara, eta aurretiaz martxan zeuden proiektuei jarraipena emateaz gain, beste mila leku bisitatu ditugu. Oso modu positiboan baloratzen dugu bidaia”, adierazi dute Yaalah Elkarteko kideek.
Bir Ganduzen aurrera eramaten dabiltzan proiektuen artean, duela bost urte hasitako emakumeen etxean jarri dute aurten ere arreta. “Beraien beharretik sortutako proiektua da honakoa, beste guztiak bezala. Bir Ganduzekin ahizpatu ginenean emakumeentzako espazio bat behar zutela esan ziguten, haimetatik irten, eta beste emakumeekin harremantzeko. Beraz, Ondarroako Udalaren laguntzarekin eta Saharako Emakumeen Batasun Nazionaleko Elkartearekin koordinatuta, martxan jarri genuen proiektua”. Finantziazioa lortu ostean, etxea sortzea izan zen lehenengo pausoa, eta ondoren, etxean bertan tailer desberdinak jarri zituzten martxan. “Josteko tailerra abiarazi zuten, eta bertan egiten dituzten produktu desberdinak prezio sinboliko baten truke saltzen dituzte”. Emakumeen etxean, egongela bat ere sortu zuten, hausnartu, eztabaidatu, ideiak partekatu eta ahalduntzeko. “Aurten, etxea bisitatzera joan gara, eta martxan zegoela ikusteak poz handia eman digu. Bai elkarteko kideoi, eta baita bertako emakumeei ere”.
Argazkia: Yaalah Elkartea.
Irina Alkorta Ondarroako alkateordea ere bertan egon da, Saharako Emakumeen Batasun Nazionaleko Elkarteak Euskal Herrian duen sarearen parte da Ondarroako Udala, eta horregatik, elkartearen 50. urteurreneko ekitaldirako gonbidapena jaso zuen Alkortak. “Emakumeen etxe desberdinak bisitatu ditut, eta beraien kongresuan egon naiz. Ondarroako Udala urte luzeetan da Euskal Herriko sarearen parte, eta orain arte bezala, elkartasuna erakusten jarraituko dugu. Sahararren borrokarekiko dugun konpromiso politikoan berresten gara”.
Horrez gain, hezkuntza arloari dagokionean, eskolako materiala banatzeko aprobetxatu dute bidaia. “Saharara etorri aurretik egin genuen material bilketa, eta bidaia honetan, zuzenean ikastetxeetara eramateko aukera izan dugu. Ikasleei zuzenean eman diegu herrian batutako materiala. Beraz, eskerrik asko eskolako materiala eman duzuen guztioi”.
Rakel Elu, Bizkaiko Batzar Nagusietako EH Bilduko batzarkidea, ere bertan izan da, eta bertako erakunde desberdinak ezagutuz, sahararren egoera politikoa hurbiletik ezagutzeko aukera izan duela azpimarratu du: “Instituzioetan lanean gabiltzan hainbat kide ere etorri gara Saharara, eta bertako elkarte eta erakunde desberdinak ezagutu ditugu. Rabunira ere joan gara bidaian zehar, eta erresistentzia museoa bisitatu dugu. Hortik AFAPREDESA Erakundeko kideekin ere egon gara; preso eta desagertuen familien elkartea da honakoa. Testuinguru politiko eta historikoa azaldu digute, eta baita, lurralde okupatuetan bizitzen ari diren egoera ere”. Horrez gain, telebista eta irrati nazionala bisitatzeko aukera ere izan dute, “egunero jartzen dituzte presoen argazkiak, eta interesgarria bezain beharrezkoa iruditu zaigu”. Erakundeetatik saharar borrokarekin bat egiten dutela adierazi du Eluk: “Hamarkada luzeetan daude erresistentzian, eta guk, instituzioetatik bat egiten dugu beraien borrokarekin”.
Elkartasun humanitarioa “positibotzat” hartzen bada ere, elkartasun politikoaren beharrezkotasuna azpimarratu du Yaalah Elkarteak: “Sahararrek modu positiboan baloratzen dute elkartasun humanitarioa, baina behin eta berriz esaten digute, elkartasun politikotik datorrela laguntza hori, eta beraien gatazka politikoa zabaltzeko ardura hartzea eskatzen digute. Hau da, gu Saharara joateak, balio izan dezala gatazkaren jatorri politikoa jendearengana heltzeko”.
Argazkia: Yaalah Elkartea.
