Ondarroako frontoia izango dute hizpide Zientziaren Giltzaken hitzaldian
Oier Otxoantezana Berriozabal arkitekto ondarrutarrak gidatuko du martitzeneko [abenduak 17] Zientziaren Giltzak Elkarteak antolatutako hitzaldia. Ondarroako Kofradia Zaharrean izango da hitzordua, 18:30ean.
Pilota jokoan, eta herriko plazaren sorreran jarriko dute begirada abenduaren 17an [martitzena] Ondarroako Kofradia Zaharrean egongo den hitzaldian, 18:30ean. Zientziaren Giltzak Elkarteak antolatutako hitzorduan frontoien bilakaeraren inguruan arituko da Oier Otxoantezana Berriozabalgoitia ondarrutar arkitektoa. Izan ere, XXI. mende aurreko Euskal Herriko frontoidun plazei begira jarriko da: “Hiri garapenak sortu dituen mugarriak, hainbat belaunaldik hirigunea sortzeari denboran zehar egindako ekarpena ekarri duen lorpen handia ikusten da. Zentzu horretan, integrazio eta bilakaera kulturalari buruzko lezioa, batez ere nekazaritza eta abeltzaintza gizartearen aldaketa soziokulturalaren aurrean, gizarte industrial eta urbanoari begira, hausnarketarako arreta berezia merezi duena”.
Aipautako hiri garapenak, pilota jokoari dagokionean, plazen sorrerak proposamen eta emaitza berriak ekarri dituela dio Otxoantezanak, “euskal pilota jokoaren herriko herri eta hiribilduetako plazen ondare eraikia behin betiko gehitu eta ekarri du”.
Ondarroako frontoian jarriko du arreta Otxoantezanak, zehazki, Ondarroako herriko frontoian: “Andra Mari elizaren oinetan, aurrez aurre daukagun paretan idatzitako datei begira, 1782, 1866 eta 1906, pentsa daiteke kareharri harlanduzko horma horiek hainbat aldiz eraiki, berreraiki, eraberritu edota moldatu direla, badutela atzean ibili luzea”. Herriaren garapenaren eta ibilbidearen “elementu nagusi eta testigu garrantzitsua” dela dio hizlariak, “zentzu horretan, Ondarroako frontoia, pilotalekuaz haratago, herriko plazen artean eredu bikaina dugun gure herrietako plazak ezaugarritzen dituzten udaletxe eta eliza eraikinekin batera sortutako kalitatezko eta esanguratsu den espazio publikoaren osaeran”.
Oier Otxoantezana Berriozabalgoitia. Otxoantezana arkitekto ondarrutara da, eta Euskal Herriko Unibertsitateko irakasle elkartua da 2007tik. Doktoretza eskuratzeko bidea egiten dabil gaur egun Pilotalekuak: sorotik plazara. tesiaren idazkeran. Horrez gain, Eusko Jaurlaritzako Industria, Trantsizio Energetiko eta Jasangarritasun Saileko Natura Ondare eta Klima Aldaketa Zuzendaritzaren Urdaibaiko Biosfera Erreserbaren Zerbitzuan Arkitekto lanean dihardu, 2022ko maiatzetik.
