34. urteurrenaren balorazio "oso ona" egin du Radixu Irratiak
Bi ekimen egin ditu Radixu Irratiak otsailean zehar; batetik, Chuleria joder! eta Tatxers taldearen kontzertuak, eta bestetik, 48 orduko etenik gabeko irratsaioa.
34. urteurrena ospatu du Ondarroako Radixu Irratiak otsailean zehar. Portuko Ranpan antolatutako kontzertuekin eman zioten hasiera, eta pasa den asteburuan borobildu zuten urteurrena, 48 orduko etenik gabeko irratsaioagaz. Antolatzaileek ekimenen balorazio “oso ona” egin dute.
Otsailaren 14an [barikua] Portuko Ranpan antolatutako Chuleria joder! eta Tatxers taldeen kontzertuekin eman zioten hasiera urteurrenari, eta ekimena “primeran” joan zela azpimarratu dute Radixu Irratiko kideek: “Oso harrera ona izan zuten kontzertuek, sarrerak segituan agortu baitziren. Oso giro ona egon zen Portuko Ranpan eta taldeek ere beraien babesa adierazi ziguten”.
48 orduko etenik gabeko irratsaioa ere “ezin hobeto” atera zela zehaztu dute: “Gaur egun programazioan ez dauden irratsaioek ere parte hartu zuten, urtero legez, eta oso ondo joan ziren denak. Horrez gain, gaur egungoak ere egon ziren, eta baita berri bat ere: Makondo. Gainera, irratsaio hau programazioan egongo da hemendik aurrera”. Bestalde, domekan [otsailak 23] 12:00etatik 14:00etara irratsaio berezia egin zuten, Irratigintza Euskal Herrian izenpean. Urtzi Urkizu Berriako kazetaria, Julen Etxegarai Errenteriako Zintzilik irrati libreko kidea eta Iban Rekalde Radixuko kidea batu ziren mahaiaren bueltan: “Irratigintzaren inguruko mahaingurua egin genuen, eta oso interesgarria izan zen”.
Radixu Irratiko kideek irratiko ateak zabalik daudela adierazi dute: “Herriaren eskura dagoen tresna bat da, interesa duen orok erabili ahal duena. Beraz, nahi duenarentzat zabalik daude Radixu Irratiko ateak”.
40 orduko irratsaioa. Argazkia: Radixu Irratia.Radixu Irratia.
