Katuen janariari lixiba eta amoniakoa bota dietela salatu dute
Miauka Markina elkarteak eta Markina-Xemeingo Udalak ekintza horiek gaitzetsi dituzte, izan ere, ez dira ekintza bakarrak izan; otsaileko bigarren astean katuen jateko ontzi berria lapurtu zuten toki beretik.
Miauka Markina elkarteak eta Markina-Xemeingo Udalak salatu dute katuentzako herrian ipinitako janlekuetako batean lixiba eta amoniakoa bota dituela norbaitek. Ekintza horiek gaitzesi nahi izan dituzte: “Ez dira ekintza bakarrak izan; otsaileko bigarren astean, katuen jateko ontzia lapurtu zuten toki beretik”.
Udalak nahiz elkarteko ordezkariek jakitera eman dutenez, otsaila hasieran anbulatorio atzean katuentzako janlekua ipini zuten, inguruko ortu jabeekin adostuta: “Argi utzi nahi dugu katuei jaten emateko gune hori ortu jabeekin adostuta ipini zela, eremu publikoan. Norbaitek gai honen inguruan arazorik baldin badauka, aurrez aurre hitz egitera animatzen dugu”.
Anbulatorio atzean ipinitako janlekua ostu dute.Miauka Markina
Elkarteko ordezkariek jakitera eman dutenez, janleku hori otsaileko bigarren astean lapurtu zuten: “Kateekin zuhaitz batera lotuta ipini genuen nahita, inork ez lapurtzeko. Eta hala ere, lapurtu egin zuten”. Janlekua lapurtu eta egun batzuetara katuen pentsuari amoniakoa bota zietela ikusi zuten: “Igarri genuen pentsua bustita zegoela, eta ukitzerakoan sekulako amoniako usaina etorri zitzaigun. Horren eraginez pentsu guztia kendu eta berria ipini behar izan genuen”. Egun berean, gainera, berriro kutsatu zuen norbaitek pentsua: “Hori gertatu zenean udaltzaingoan salatu genuen. Orduan, sarriago joaten hasi ginen, pentsua kontrolatzeko. Egun berean iluntzean joan ginen, eta lixiba bota zion norbaitek”.
Katuen pentsuari lixiba eta amoniakoa bota dizkiote.Miauka Markina
Udalak gogorarazi du animalien babeserako udal ordenantzan mota horretako ekintzak arau hauste oso larritzat jotzen direla. Era berean, elkarteko ordezkariek ere gogorarazi dute udaletxearekin duten hitzarmenari esker dutela katuak zaintzeko baimena: “Urtebete da udalarekin hitzarmena sinatu genuenetik eta gu sortu ginenetik, eta orain arte ez dugu inolako arazorik eduki. Gertakariak salatu nahi ditugu hori egin duenak berriro egin ez dezan. Eraso larria da egin duena”.
