Portu eremuaren eraldaketari buruzko galdetegia zabaldu du Mutrikuko Udalak
Galdetegia betetzeko epea otsailaren 28an [barikua] amaituko da.
Portu eremuari buruzko gogoeta prozesuan murgildurik dago Mutrikuko Udala. Honen harira, Mutrikuko herritarrei zuzendutako galdetegia zabaldu du, portuaren inguruan dauden “iritzi, balorazio eta askotariko ikuspegiak” bilatu eta “adostasun markoa” eratzeko. Galdetegia betetzeko azkenengo eguna otsailaren 28a [barikua] izango da.
Herritarrei bideratutako galdetegia bost ataletan banatuta dago, eta portu eremuaren inguruko hainbat baieztapen daude bakoitzean, lau multzotan banatuta: Azken hamarkadetako egoera, gaur egungo egoera, erakunde publikoekiko harremana, eta aurrera begirako neurriak. “Emaitzekin herritarren iritzien mapa osatuko da, eta aurrera begira portu eremuak izan ditzakeen berrikuntzetan iritzi horiek kontuan hartu daitezen eskatuko du udalak”.
Bi modutara bete daiteke galdetegia: online edo paperean. Online bidez, Mutrikuko Udalaren webgunean bete daiteke, eta paperean nahi duen herritarrak, etxean jasotako galdetegia bete ahalko du. “Galdetegia paperean betez gero, udalak jarritako postontzietan utzi beharko da”. Postontziak dauden lekuan bi hizkuntzatan egongo dira galdetegiak: euskaraz eta gaztelaniaz. “Online betetzen bada, loturan sartu eta goialdean hizkuntza aldatzeko aukera ematen duen botoia agertuko da”.
Udalak zehaztu duenez, udatik hona, bi mailatan egin da portu eremuaren inguruko gogoeta eta lanketa: “Alde batetik, udal barruan, talde politikoen artean barne gogoeta egin da, eta Eusko Jaurlaritzako agintaritzarekin harremanetarako kanala sortu dugu. Bestalde, herritarren artean, bi modutan egin dira elkarrizketak. Bata, herritar indibidualekin, eta bestea, herriko hainbat eragileekin”. Mutrikuko Udalak herritar guztiak deitu ditu galdetegia betetzera, eta aldez aurretik “esker ona” luzatu die.
