Portuko jabari publikoko zenbait gune kudeatzeko eskumenak jaso ditu Ondarroako Udalak
Eusko Jaurlaritzako Portuko Zuzendaritzak eta Ondarroako Udalak portuko jabetzako 35.000 metro koadro kuadeatzeko emakida akordioa sinatu dute. Ondarroako EAJk "begi onez" ikusi du akordioa, baina "berandu" datorrela aurpegiratu dio EH Bilduko udal gobernuari.
Koldo Goitia Eusko Jaurlaritzako itsasertzaren Garapeneko, Portuetako eta itsas Gaietako zuzendaria (ezkerrean) eta Irina Alkorda Bedialauneta Jarduneko Alkatea (eskuinean). Ondarroako Udala. Eusko Jaurlaritzako Elikadura, Landa Garapen, Nekazaritza eta Arrantza Sailak sektorialik ez duten eta portuko jarduera nagusirako beharrezkoak ez diren portu jabari publikoko 35.000 metro koadro utzi dizkio Ondarroako Udalari. Eguenean [otsailak 27] sinatu zuten akordioa Irina Alkorta Bedialauneta jarduneko alkateak, eta Koldo Goitia Eusko Jaurlaritzako Itsasertzaren Garapenaren, Portuen eta Itsas Gaien zuzendariak. Hitzarmenari esker, jabari publikoaren barruko gune batzuk “kudeatu eta ustiatzeko, eta trafikoa kudeatzeko eskumenak” jaso ditu udalak.
Zubi Zaharreraino iristen da portuaren eremua, eta nahiz eta akordioa sinatu eta gero ere eremu guztiak Eusko Jaurlaritzarena izaten jarraituko duen, kudeaketa udalaren esku geldituko da. Irina Alkorta Bedialauneta jarduneko alkateak udalerriak akordio hau “behar” zuela azpimarratu du: “Hitzarmen historikoa da, herriak behar zuena. Ondarroako herria, den bezalakoa denez, jabetza askoren menpe dago, eta guretzat oso garrantzitsua da horien kudeaketa herriratzea”. Bost urteko iraupena dauka akordioak, eta bosna urteko beste bi luzapen egiteko aukera dagoela adierazi du udalak.
Txori Errekako biribilgunetik portuko biribilgunerainoko trafikoa kudeatzeko eskumena udalarena izango da. Horrez gain, Antiguako Ama kalea, Itsasaurre plaza eta bertako aparkalekua, Alameda, Kafeatzea, Nasa Kaleko espaloia eta Astilleru ere Ondarroako Udalak kudeatuko ditu, orain arte ez bezala. “Herriguneko 35.545,26 metro karratu jasoko ditu emakidan Portu Zuzendaritzarengandik, 30.469, 60 metro karratu eremuen kudeaketari eta ustiapenari dagozkionak eta 5.075,66 metro karratu trafikoaren kudeaketari dagozkionak”.
“Udalak zuzenean kudeatuko ditu eremu hauek eta ez du tasarik ordaindu beharko edota lan burokratikorik egin beharko”
Eusko Jaurlaritzako Itsasertzaren Garapeneko, Portuetako eta Itsas Gaietako zuzendaria den Koldo Goitiak zehaztu duenez, abenduan eskatu zuen udalak portuko jabaria okupatzeko emakida: “2024ko abenduaren 5ean, Ondarroako Udalak portuan portu jabaria okupatzeko emakida eskatu zuen eremu jakin batzuk kudeatu eta ustiatzeko, bai eta Txorierrekako biribilgunetik, Calatrava zubirantz, lonjaren ondoko biribilgunerainoko bideko trafikoa kudeatzeko ere”.
Hitzarmenaren bitartez, Ondarroako Udalak zuzenean kudeatu ahal izango ditu herriko gune hauek, eta ez du tasarik ordaindu beharko ezta lan burokratikorik egin beharko: “Herriko kultur edo aisialdi jarduera gehienak (Andra Mari jaiak, Galiziar Etxearen jaiak, Merkatu Txikia, estropadetako fan-zone, liburu azoka, Antxoa Eguna eta triatloia, besteak beste) orain arte Portu Zuzendaritzak kudeatzen zituen eremuetan egiten ziren: itsasaurre, Alameda, Kafeatzean… Horrek suposatzen zuen herriko talderen batek zerbait eskaini nahi zuen bakoitzean udalak baimen eskaera berezia egin behar izaten zuela, eta dagozkion tasak ordaindu. Hitzarmen honi esker udalak zuzenean kudeatuko ditu eremu hauek eta ez du tasarik ordaindu beharko edota lan burokratikorik egin beharko, dirua eta denbora aurreztuz”. Iaz, 40 ekimen desberdinetarako dagozkion irizpide guztiak egin behar izan zituen Ondarroako Udalak Portu Zuzendaritzarekin, ekintzan “behar modura” gauzatu ahal izateko.
EAJren balorazioa
Bestalde, Ondarroako EAJk aukera “erabakigarri” gisa ospatu du itsas portuko lurraren akordioa, nahiz eta “berandu datorrela” aurpegiratu dion EH Bilduren gobernuari: “Ondarroako EAJk bere poza adierazi nahi du gaur, Euskal Autonomia Erkidegoko Portuen eskumenpeko 35.000 metro karratu baino gehiagoren lagapena berretsi delako. Gogorarazi nahi dugu lagapen hau ez dela bat-bateko erabakia izan, baizik eta urteetako lan politikoaren emaitza. Gutxienez zortzi urte pasatu dira, Eusko Jaurlaritzak Ondarroako Udalari hitzarmen hau sinatzeko proposamena luzatu zionetik, eta geroztik, EAJk etengabe eskatu dio EH Bilduren udal gobernuari akordioa sinatzeko. baina proposamena iazko urtera arte baztertuta egon da, kaxoi batean sartuta”. EH Bilduko ordezkariek EAJ prozesu guztiaren “jakitun” egon dela adierazi dute: “Prozesu guztiaren berri izan du EAJk. Badakite akordio ona dela, baina kontrako zerbait esan behar dutenez, berandu datorrela diote, nahiz eta badakiten prozesuaren denborak zeintzuk izan diren. Akordio hau ez da partiduen arteko zerbait, herriaren eta herritarren onurarako hitzarmena baizik”.
Horrez gain, udal ordezkariek zehaztu dutenez, aurreko agintaldian hasi ziren akordio sinatzeko saiakerak egiten: “Arrazoi desberdinengatik atzeratu da hainbeste prozesua. Izan ere, aurreko agintaldian, Zunbeltz Bedialauneta alkate zegoenean, hasi ginen akordiora lortu nahian baina ez zen posible izan. Agintaldi honen oinarrietako bat sinatu berri dugun akordioa zen, eta Urtza Alkortak kargua hartu eta hilabetera hasi zen prozesua martxan. Baina orduan, Eusko Jaurlaritzako hauteskundeak heldu ziren, eta arduradun aldaketak ekarri zituen. Beraz, horrek prozesua mantsoago joatea ekarri zuen”. Hala ere, Ondarroako Udalak eskerrak eman nahi dizkio Koldo Goitiari, erakutsitako prestutasunagatik: “Eskerrak eman nahi dizkiogu Koldo Goitiari, egindako lan eta esfortzu guztiagatik, eta baita, sinatu berri dugun hitzarmena sinatzea posible egitearren”.
Udal kudeaketa hobetzeko “funtsezko” akordioa dela adierazi du EAJk: “Akordio hau funtsezkoa da udal kudeaketa hobetzeko, trafikoa optimizatzeko eta espazio publikoaren antolaketa eraginkorragoa egiteko, baita udalerriaren garapen urbinistiko eta ekonomikorako aukera berriak zabaltzeko ere”.
“EAJk etengabe eskatu dio EH Bilduren udal gobernuari akordioa sinatzeko. baina proposamena iazko urtera arte baztertuta egon da”
Hitzarmena udalerriaren etorkizunerako “garrantzitsua” dela adierazi dute jeltzaleek: “Hitzarmena aukera erabakigarria da Ondarroaren etorkizunerako. Azkenean, udalak bere kabuz kudeatu ahal izango ditu udalerriarentzat estrategikoak diren espazioak, garapen ordenatu eta iraunkorra bultzatuz. EAJtik urteak daramatzagu lagapen hau defendatzen, Ondarroak bere etorkizunaren jabe izateko ahalmena izan behar duelako”. Hala, Ondarroarekiko duten konpromisoan berretsi dira jeltzaleak: “Herriarekiko dugun konpromisoan berresten gara: lotura hobeak, espazio publikoen kudeaketa eraginkorra eta garapen orekatu eta moderno baterako bidean”.
