Mendexako mendi martxan apuntatzeko epea laster amaituko da
Martxoaren 28a [barikua] baino lehen eman beharko da izena; Mendexako udaletxean edo online bidez.
Mendexako Udalak Mendexako mendi martxa antolatu du apirilaren 6rako [domeka], eta oraindik izena emateko aukera dagoen arren, martxoaren 28an [barikua] itxiko da. Bi modu daude apuntatzeko; zuzenean Mendexako udaletxean, edo online bidezko galdetegia beteta. Bi ibilbide egongo dira: handia eta txikia. Lehenengoaren prezioa 10 eurokoa izango da, eta bigarrenarena, 6 eurokoa.
Bi ibilbideak hasiko dira Mendexako plazatik. Handia, 09:00etan hasiko da, eta 16 kilometroko ibilbidea izango da, 627 metroko desnibelagaz. Lau ordu inguru iraungo ditu, gutxi gorabehera, eta 15,5 kilometroan hornidura puntua egongo da. Mendexako plazatik Zuluetako errotara joango dira mendizaleak, eta gero Okabioko lepotik Elexpuru gainera joango dira. Karakola eta Egitatik pasa eta Mendexako plazara itzuliko dira.
Ibilbide txikia 10:30ean hasiko da, eta bi ordu eta erdikoa izango da, gutxi gorabehera. Guztira 9 kilometro izango ditu, eta 4,8 kilometroan egongo da hornidura puntua. Hasierako zatia ibilbide handiaren berdina izango da. Mendexako plazatik Zuluetako errotarantz egingo dute, eta ondoren, Okabioko lepora, eta hortik, Elexpuru gainera. Elexpurutik pasa ondoren, Laratrozuluetara joango dira mendizaleak, eta hortik Karakola eta Egita igaro ondoren, Mendexako plazarako bidea hartuko dute.
Antolatzaileek apuntatzeko deia egin die herritarrei, eta gogorarazi dute, apuntatu ostean mendexa@gmail.con helbide elektronikora bidali beharko dela ordainketaren ziurtagiria, eta hurrengo kontura egin beharko da transferentzia: ES0920954408552050001155.
