Ane Mendibe: "Ikusezina da egiten dugun lana, baina esfortzu handia dago atzetik"
Urte osoko lanaren ostean, Lea-Artibaiko 46 ume prest daude gimnastika erritmikoko erakustaldia eskaintzeko: domekan dute lehenengoa, Etxebarriko frontoian, 18:00etan. Maiatzaren 18an, ostera, Berriatuan eskainiko dute erakustaldia, eta ekainaren 15ean, Markina-Xemeinen.
Orduak, orduak eta ordu gehiago. Gimnastika erritmikoak ordu asko, diziplina zorrotza eta exijentzia maila altuak eskatzen ditu. Atzetik dagoen lana handia da, eta hori ondo baino hobeto daki Ane Mendibe Bilbao (Markina-Xemein, 2002) entrenatzaile eta gimnasta ohiak. Duela bi urtetik bere eskuetan dago Markina-Xemeingo gimnastika erritmikoko taldea, eta urte guztian egindako lana erakusteko, hiru erakustaldi eskainiko dituzte; lehenengoa domekan izango da, 18:00etan, Etxebarriko frontoian. Hori gutxi ez, eta beste bi erakustaldi ere eskainiko dituzte: maiatzaren 18an, 18:00etan, Berriatuko frontoian eta ekainaren 15ean, 17:30ean, Markina-Xemeingo Uni frontoian. Gimnastika erritmikoari ikusgarritasuna emateko bidean, beste pauso bat eman nahi izan dute aurten, hiru erakustaldi eginez.
Badatoz erakustaldiak. Aurten, gainera, hiru herritan. Lehenengo aldia da?
Markina-Xemeinen urtero egiten ditugu erakustaldiak, eta umeei ilusio handia egiten die. Horregatik, aurten bat baino gehiago egitea erabaki dugu. Maillota janzteak, makillajeak, orrazkerak… ilusio berezia egiten die umeei, eta hori entrenamenduetan ez dago. Horregatik, inguruko herrietan ere erakustaldiak eskaintzea pentsatu genuen. Apiril hasieran pentsatu genuen Markina-Xemeingoagaz batera gehiago egin genitzakeela, eta Berriatuko nahiz Etxebarriko umeak ere badaudenez taldean, herri horietan egitea erabaki dugu.
Zenbat umek parte hartuko dute?
Aurten 46 ume dira. Nik entrenatzaile bakar modura bi urte daramatzat, eta 40tik gora eduki ditut bi urteetan. Duela urte batzuk 80 izatera ere heldu ginen; garai oso onak egon dira tartean, baina pandemia garaian ume gutxiko denboraldiak ere egon dira, 30 ume ingururekin. 5 urte eta DBH 1eko bitartekoek eskainiko dute erakustaldia.
Zer ikusiko dute erakustaldira joaten direnek?
Dantza pila bat, eta umeek urte guztian egindako esfortzuaren emaitza. Gainera, Markina-Xemeingo erakustaldira Eibarko gimnastak ere etorriko dira. Ez da erraza umeek dantza guztiak ikastea, ze, batzuk oso txikiak dira. Hala ere, esfortzu handia egin dute, eta dantza politak aterako dira.
Nagusiei erakustea errazagoa da?
Kontua ez da nagusia izatea edo ez, kontua da zenbat denbora daramazun gimnastika erritmikoa egiten. Gimnastika erritmikoa ulertu egin behar da, eta ulertzeko, urteak behar dituzu. Gainera, ulertzen hasten zaren momentuan, utzi egin behar duzu, ze, hemen DBH 4. mailaraino bakarrik eman dezakegu; hortik aurrera, beste herri batera joan behar da.
Lea-Artibain badago beste talderik?
Nik dakidanez, ez dago ez Lea-Artibain, ezta Mutrikun ere; gurea da talde bakarra. Gertuen Durangon dago, eta bestela, Eibarrera joan behar da. Gainera, irakasleak ere gutxi daude hemen. Markina-Xemeinen, esaterako, ni neu naiz herriko taldea entrenatzen duen lehenengo bertoko entrenatzailea.
“Badakit ikustera joan, eta ez baduzu ulertzen, ez dela erraza jarraitzea, baina, merezi du saiatzeak”
Lea-Artibaiko talde bakarra izatea eta kirol honek daukan ikusgarritasuna lotuta egon daitezke?
Bai, eta goitik datorren zerbait da. Telebista ipintzerakoan, esaterako, ez dago gimnastika erritmikorik. Orokorrean, gutxietsita dagoen kirola da, eta jendeak ez du baloratzen atzetik zenbat lan daukan. Herrian bertan, hala ere, ume asko pasatu dira taldetik, eta era batera edo bestera, herritarrek izan dute kirolaren berri.
Gaitza da ibilbide profesionala egitea?
Entrenamendu asko-asko eginda ere, oso gaitza da norabait heltzea. Gainera, norbere bizitza pertsonalarekin uztartzea ere oso gaitza da, ordu asko eskatzen dituen kirola delako, bai ikasteko, bai erakusteko.
Erraza ez den arren, zuk zeuk ordu asko eskaintzen dizkiozu gimnastika erritmikoari. Zelako esperientzia ari da izaten herriko entrenatzaile bakarra izatea?
Ni neu Lehen Hezkuntzako lehenengo mailan hasi nintzen ikasten. Gaztetxoago nintzenean, orduko irakasleari laguntzen hasi nintzen, eta ordutik beti aritu izan naiz laguntzen. Bi urte hauek gogorrak izaten ari dira; ume asko dira eta ez da erraza denei hiru dantza edo gehiago erakustea. Iaz, esaterako, ordu eta laurdenean 5 urteko hemezortzi ume nituen, eta bakoitzari hiru dantza erakustea, ez da erraza. Hala ere, oso pozik egiten dut. Eta gainera, oso polita da umeei ere gogo berdinarekin ikustea. Gauza desberdinak egiten saiatzen naiz eurak motibatuta egon daitezen, eta erakustaldia horietako bat da.
Zer esango zenioke joateko zalantzan dagoenari?
Badakit ikustera joan, eta ez baduzu ulertzen, ez dela erraza jarraitzea, baina, merezi du saiatzeak. Ikusezina da egiten dugun lana, eta ikusezina da Berriatuan, Etxebarrian edo Markina-Xemeinen irtengo diren umeek egin duten lan dena. Lan eta esfortzu handia egin dute dantzak aurrera ateratzeko, eta merezi du aukera bat emateak. Kirol polita eta alaia da, eta arratsalde desberdin bat eduki eta kirol berri bat ezagutzeko aukera bertatik-bertara dute.
Aurrera begira, herriko taldearekin lortu nahiko zenukeen zerbait badago?
Gustatuko litzaidake izen ona edukitzea, esaterako, zesta puntak daukan moduan. Badakit inoiz ez dela Markina-Xemein gimnastika erritmikoarekin lotuko zestarekin lotzen den bezala, baina gustatuko litzaidake kirolak garrantzia hartzea herrian, eta ez izatea soilik kirol bat gehiago.
