Pausuz pausu, trantsizio ekosozialerantz
Ziortza-Bolibarren Ingurumen Asteburua ospatu dute. Markola errekaren garbiketan bi talde aritu ziren lanean, eta "ondo" baloratu dute. Eskualdeko ekoizleen azoka ere ondo joan da.
Ziortza-bolibartarrak, pausuz pausu, trantsizio ekosozialerantz bidea egiten ari dira. Joan den asteburukoa izan da horren erakusgarri, izan ere, ekainaren 5ean ospatzen den Nazioarteko Ingurumen Egunaren harira, Ingurumen Asteburua ospatu dute herrian.
Zapatuan [ekainak 7], Aranbaltz kultur taldearen ekimenez, Markola erreka garbitzeko tartea hartu zuten: “Bi talde aritu ziren garbiketan, batez ere, plastikoa erretiratzen. Beheko zubian hasi eta Elizaldean Usandiraino aritu zen. Bigarren taldea Usanditik ia-ia Txirturaraino aritu zen”. Bildutako zabor guztia plazako txoko batean utzi zuten domekara arte [ekainak 8], “herritarrek ikusteko moduan”. Hala, Ziortza-Bolibarko Udalak nahiz Aranbaltzeko “ondo” baloratu dute zapatuko ekimena.
Atzo [ekainak 8] ostera, eskualdeko ekoizleen azoka egon zen plazan. 10 postu ipini zituzten, eta besteren artean, eskulanak, bitxiak, txerrikiak, esnekiak, ogiak nahiz pastelak erosteko aukera egon zen. Lea-Artibai Mankomunitatea ere bertan izan zen konposta eta tomate landareak banatzen: “Konpost eta tomate landare guztiak banatu ziren. Mankomunitateko teknikaria gustura azaldu zen jendearen parte hartzearekin”. Era berean, Bolintxu energia komunitateko kideak ere “pozik” agertu dira atzoko egunagaz.
Azoka hasteagaz batera Iñigo Arruabarrena Amaterra enpresako ingeniari agronomoak eta Nerea Urrutibeaskoa Landarapen Alkarteko teknikariak eskualdeko abeltzaintza proiektuari buruzko hitzaldia eskaini zuten. Osoko bilkura aretoa goraino bete zuten herritarrek: “Giro paregabea egon zen, eta proiektuak interesa piztu zuen”.
