San Pedro jai herrikoiak, auzo eta herrietan
Berriatuan, Mutrikun, Artan (Ziortza-Bolibar) eta Barinagan (Markina-Xemein) prest daude San Pedro jaiei hasiera emateko.
Herri handiagoetatik aldendu, eta izango da sanpedroak non ospatu Lea-Artibain. Eguraldi eguzkitsua dago iragarrita, eta pozez hartuko dute asteburua Berriatuan, Artan (Ziortza-Bolibar), Barinagan (Markina-Xemein) nahiz Mutrikun. Bertokoentzako jaiak izan ohi direla esan dute denek, baina inguruko herrietakoak ere, gustura hartuko dituzte: “San Pedro jaiak herrikoiagoak dira, herritar nahiz auzotarrak mugitzen gara gehienbat”.
Hala, berriatuarrek gaur [ekainak 26] hasi eta astelehenera bitartean ospatuko dituzte San Pedro jaiak. Jai herrikoiez gozatzeko aukera edukiko dute, eta urteroko ekitaldiek hutsik egingo ez duten arren, berrikuntzaren bat ere egongo da tartean: “Gauza pila bat daude, oso herrikoiak. Ze, halakoak izaten dira sanpedroak Berriatuan. Euren historia duten ekitaldia dira, pila bat urtez antolatu izan direnak”. Horien artean dago, esaterako, gaur egingo den Berritxu Saria.
Berrikuntzetako bat, ostera, bihar [ekainak 27] helduko da, Maru eta Lami erraldoien ipuinaren aurkezpenagaz: “Herriko erraldoiak dira, eta euren inguruko liburuxka bat egin dute Erraldoien Konpartsako kideek. Erraldoien inguruko historia jasotzen du”.
Domekan, ostera, kirola izango da protagonista. Esku pilota partiden ostean, bola joko txapelketa egongo da, eta ondoren, Euskal Selekzioko jokalariek zesta punta partida jokatuko dute: “Omenaldia ere egin genien herritarrei, baina gurea indartu nahi dugu, eta horregatik antolatu dugu hau”. Gogorarazi dute sarrerak online erosi behar direla.
Mutrikun, ostera, ekitaldi xumeago bat egingo dute. San Pedro egunez arrantzaleen patroia gogoan hartu, eta urteroko legez, itsasoan desagertutako arrantzaleei omenaldia egingo diete Kofradia Zaharrean.
Auzoak, jai betean. Berriatuan bezala, Barinagan ere San Pedro jaietan “gehienbat auzotarrak” ibiltzen direla azaldu dute. Hala, jaiak bihar [ekainak 27] hasiko dituzte, eta zapatuan [ekainak 28], besteren artean, Alfonso Unamuno perratzailearen erakustaldia egongo da, lehenengoz. Jarraian, bazkaritarako elkartuko dira 100 auzotar inguru: “Dena antolatzen dugu auzotarron artean, eta zapatuko bazkaria ere hala izango da. Gainera, bertokoek eginda eta bertoko produktuekin, ze, bildotsak auzoko baserri batekoak dira eta entsaldarako produktuak ere ingurukoei hartzen dizkiegu”. Arratsalderako, ostera, idi probak berreskuratu dituzte: “Urte batzuetan ez dira egin, baina aurten berriro egitea erabaki dugu”. Maruri-Jatabeko Billabasok, Zumarragako Zubillagak eta Muruetako Kamiñoko Jatetxeak parte hartuko dute.
Domekarako, ostera, egitarau xumeagoa prestatu dute. Hala ere, gogoz daude auzoko jubilatuak eguna heltzeko. Izan ere, urteroko jubilatuen bazkaria egingo dute, tabernan; txartelak salgai daude Kontzeju Zahar tabernan edo 632 85 62 48 telefonora deituz.
Ziortza-Bolibarko Arta auzoan bi eguneko egitarauagaz gozatzeko prest daude. Zapatuan XII. Briska Txapelketa egongo da, eta urtero bezala, 20 bikote ingururen parte hartzea espero dute. Domekan, ostera, egun handia ospatuko dute. Egun guztiko egitarua edukiko dute aurretik. 11:00etako mezaren eta Zerutxu Dantza Taldearen emanaldiaren ostean, Nerea Ibarzabal eta Uxue Alberdi bertsolariak egongo dira. Bazkalostean, aldiz, umeen txanda izango da: “Umeen jolasak egingo ditugu, urteroko legez. Zain egoten dira umeak egun hori heltzeko, gustura hartzen dute”.
“Betiko egitaraua” duten arren, formulak “ondo” funtzionatzen duela adierazi dute: “Urteetako egitaraua da, urtero aldaketa txiki batzuekin, baina formula berdina erabiliz. Ondo funtzionatzen du auzotarren artean eta horregatik errepikatzen dugu”. Azaldu dutenez, 15 auzotar inguru aritzen dira jaiak antolatzen, eta erreleboa ere ziurtatuta dute: “Gazte batzuk ere ari dira lanean. Ez dauka agian lehen besteko indarra, baina ari dira. Eta auzotarrek gustura hartzen dituzte jaiak, beraz, jarraituko dugu”.
Ziortza-Bolibarko Arta auzoko San Pedro jaiak.Artako Jai Batzordea
BERRIATUA
- Bihar, Umeen Eguna
- 11:00-13:00 eta 15:00-17:00. Umeentzako parkea, plazan.
- 13:30. Umeen bazkaria, plazan.
- 17:00. Apar festa, plazan.
- Ondoren. Txokolatea, plazan.
- 19:00. Briska, Mendibarren frontoian.
- 19:30. Maru eta Lamiren ipuinaren aurkezpena, herriko plazan; euriagaz, udaletxean.
- 20:00. Musa, Mendibarren frontoian.
- Etzi, zapatua
- 09:30. Triatloi herrikoia, plazan.
- 14:30. Entsalada eta tortilla txapelketa, plazan.
- 18:00. Gau Argi erromeria, plazan.
- Domeka, San Pedro eguna
- 12:00. Meza, San Pedro elizan.
- 13:00. Eskupilota partidak, kanpoko frontoian; euriarekin, Mendibarren frontoian. Lehenengo partida: Malen Mena (Lemoa) eta Marta Gomez (Danok Lagunak) VS June Urrutikoetxea (Durango) eta Amaia Zarrabeitia (Arkupe). Bigarren partida: Xabi Beitia (Lagun Onak) eta Endika Uriondo (Lea) VS Aimar Okamika (Lea) eta Alain Pujana (Markina-Xemein)
- 17:00. Bola joko txapelketa.
- 19:00. Profesionalen zesta punta partidak (Euskal Selekzioko jokalariak), Mendibarren frontoian. Sarrera: 10 euro.
- Ekainak 30, astelehena
- 19:00. Eraitsi S.L. kale antzerkia, plazan; euriagaz, Mendibarren frontoian.
MUTRIKU
- Domeka, San Pedro eguna
- 12:00. Itsasoan desagertutako arrantzaleei omenaldia, kofradia zaharrean.
BARINAGA AUZOA (MARKINA-XEMEIN)
- Bihar, barikua
- 17:00. Gaztetxoen arteko pilota partidak.
- 20:00. Txupinazoa eta txikiteoa.
- Iluntzean. Su artifizialak.
- Etzi, zapatua
- 12:30. Perratzailearen erakustaldia.
- 14:00. Herri bazkaria: entsalada mista, bildotsa, postrea, kafea eta kopa.
- 17:00. Umeen jolasak.
- 17:30. Idi probak: Billabaso (Maruri-Jatabe), Zubillaga (Zumarraga) eta Kamiñoko jatetxea (Murueta). Idi bikote bakoitzak 800 euro jasoko ditu.
- 21:00. Hiru txirlo lehiaketa.
- Domeka, San Pedro eguna
- 12:15. Meza.
- 13:00. Mezaostekoa.
- 14:00. Jubilatuen bazkaria tabernan. Tiketak Kontzeju-Zahar tabernan edo 632 85 62 48 telefonora deituta.
ARTA AUZOA (ZIORTZA-BOLIBAR)
- Etzi, zapatua
- 17:00. Artako XII. Briska Txapelketa.
- Domeka, San Pedro Eguna
- 11:00. Meza santua.
- 12:00. Zerutxu Dantza Taldea.
- Ondoren. Nerea Ibarzabal eta Uxue Alberdi bertsolariak.
- 18:00. Umeen jolasak.
- Egun guztian. Imanol Intxausti eta Iñaki Larrañaga trikitilariak.
