Aurten Be Bai taldea, sanantolinetako 29. Paella Txapelketako irabazle
San Antolin jaietako hirugarren egunean Kamiseta Eguna ari dira ospatzen lekeitiarrak. Kuadrillen arteko jolasetan giro ederra egon da, eta baita 29. Paella Txapelketan ere: guztira 62 taldek eman dute izena. Parkeko Gunean, aldiz, tiragomekin jolasean aritu dira.
Kuadriletako bat paella aurkezten. Haize zakarra egon den arren, uda-udako eguzkiagaz esnatu da gaur [irailak 3] Lekeitio. San Antolin jaietako hirugarren egunean denetariko kamisetek hartu dituzte herriko kaleak, Kamiseta Eguna ospatzeko, hain zuzen ere. Hala, hainbatek kuadrillako kamisetak jantzi dituzte, baina izan da aldarrikatzeko aukera aprobetxatu duenik ere.
Goiztiarrenak 10:00etarako paellak prestatzen hasi dira. Urtez urte nahiz lehenengoz parte hartzen dutenek plazako eta inguruetako txoko guztiak hartu dituzte, eta 29. Paella Txapelketari hasiera eman diete. Iaz baino zortzi talde gehiagok eman dute izena aurten: iaz 54 talde izan ziren, eta aurten, 62 izan dira.
Urteroko moduan, denetariko paellak eroan dituzte herritarrek: okeladuna, itsaskiduna, barazkiduna… eta izan da paella apaindu, eta Lekeitioren 700 urteei edo Palestinari keinu bat egin dienik ere. Hala, paellak aurkeztu ahala, Mari Cruz Kobeaga, Bego Kariño eta Pello Hernando epaileek dastatu egin dituzte; iaz ere euren esku egon zen erabakia. Itxura, arrozaren puntua eta zaporea baloratu dituzte, eta Aurten Be Bai izan da irabazlea, 54 puntugaz. Bigarren postuan Kiskirri2 taldea geratu da, 52 puntugaz. Hirugarrena, ostera, Bauan, Bauan izan da, 50 puntugaz. Era berean, puntuazio baxuena lortu duen paellari farolillo gorria eman diete: Txoetorri taldeak 13 puntu lortu ditu.
[PAELLA TXAPELKETAKO EMAITZAK]
Herritarrak paellak prestatu bitartean, Itxaropena txistulari taldeak kalejira eta kontzertua eskaini ditu. Plazan eta inguruetan jende ugari bildu da txistulariak entzuteko. Errepertorio zabala eskaini dute musikariek, eta beste hainbat herriarrek ere parte hartu dute: Unai Egiak eta herriko umeek Izan Lekeitio 700 abestia eskaini dute, eta Etorkizuna dantza taldekoek, hainbat dantza.
Jolas artean. Paellak prestatzen hasteagaz batera, Garraitz Kirol Taldeak kuadrillen arteko jolasak egin ditu Abadeen moilan. Zortzi taldek parte hartu dute, eta istripuren bat tarteko, lagunarteko giro ederrean lehiatu dute kuadrillek. Besteren artean, bizkar gainean korrika, igerian eta zaku karrera egin dute erreleboka, eta Garraitzek lortu du azkarrena izatea. Atzetik geratu dira Abante, Diki, Marujeua eta Las Tijuaneras taldeak. Nesketan, aldiz, Bagabizek lortu ditu lehen bi postuak, eta Amuma Makurrak, hirugarrena.
Umeek ere eduki dute zer egina. Parkeko Gunea haren 15. urteurrena ospatzen ari da aurten, eta egitarau anitza antolatu dute jaietarako. Gaurkoan tiragomak egiten eta haiekin jolasten aritu dira. Ume ugari elkartu da gunean, eta pozik egin dituzte tiragomak. Arratsaldean gaztelu eta zulo txapelketa egingo dute, eta atun errea emango dute 19:00etan. Parkeko Guneko gaurko egitaraua Gu ta Gitarrak taldearen kontzertuak itxiko du.
