25 urte beteko ditu aurten Ondarroako Umeen Arrantza Lehiaketak
Antolatzaileek prest daukate dena zapatuan [urriak 4] egingo den 25. Umeen Arrantza Lehiaketarako. 14:30ean emango diote hasiera, eta momentuz, 319 umek eman dute izena.
Suziriagaz batera hasiko da zapatuan [urriak 4] 25. Umeen Arrantza Lehiaketa Ondarroan, 14:30ean. Hala ere, 14:00etarako herriko frontoian batuko dira parte hartzaileak, bokatak, amua eta aparailua jasotzeko. Antolatzaileek jakitera eman dutenez, momentuz 319 umek eman dute izena ikastetxeetan, baina aurreikuspenen arabera, 400 lagun inguruk parte hartuko dute lehiaketan.
Musika Plazan hasiko da txistularien kalejira, eta herriko kaleak zeharkatu ondoren, Itsasaurrera heldu eta suziri hotsagaz batera ume bakoitzak bere postua hartuko du. Plaiko zubitik Barra punturainoko tartean arrantzatzeari ekingo diote.
Hasiko den bezala amaituko da lehiaketa: bigarren suziri bategaz. Ondoren, berriro ere herriko frontoian batuko dira parte hartzaile guztiak, eta Herribixi kolektiboko kideen emanaldiaz gozatzeko aukera izango dute. Gero, sari banaketari ekingo diote, eta 4-8 urte bitartean eta 9-14 urte bitartean arrain gehien arrantzatu dituztenek jasoko dute saria, baita, parte hartzaile guztien artean arrain pisutsuena arrantzatu duenak. Hala ere, ume guztientzako sariak egongo direla azpimarratu dute antolakuntzako kideek. Horrez gain, parte hartzaile gazteenen artean zozketa egingo da.
Baldintzei dagokienez, amuarekin arrantzatu beharko da, eta ezingo dute lazunik arrantzatu. Horrez gain, 10 zentimetrotik gorako arrainak soilik arrantzatu beharko dituzte umeek.
25. urteurrena. Aurten hogeita bost urte beteko ditu Arrantza Lehiaketak, eta honen harira, aipamen berezia egingo zaie urte guzti hauetan antolakuntzan ibili direnei. “Egun berezia izaten da, eta aurten are bereziagoa izango da urteurrenagaz. Eskerrik asko herriko denda eta laguntzaileei, azken 25 urteotan lehiaketa hau aurrera eramaten lagundu diguzuelako”.
